‘Akuphele ukufika ngemuva kwesikhathi’
ZAZOWUKHOMBA umuzi onotshwala abasebenzi bakahulumeni KwaZulu-Natal abafika ngemuva kwesikhathi, bahambe ngaphambi kwesikhathi sokuphuma nabathatha ikhefu elide emsebenzini.”
Lokhu kushiwo ngumqondisi jikelele ehhovisi likaNdunankulu waKwaZulu-Natal, uDkt Nonhlanhla Mkhize, oqokwe izolo waba ngowesifazane wokuqala ukuphatha isikhundla esifundazweni selokhu kwangena uhulumeni wentando yabantu ngo1994.
UDkt Mkhize uthe abasebenzi bahulumeni kumele baqonde ukuthi bakhokhelwa ngemali yabakhokhibentela.
Uthe umphakathi kumele usizakale uma uzofuna usizo emahhovisi kahulumeni, ungafiki abasebenzi bengekho belovile, befike ngemuva kwesikhathi noma behambe isikhathi singakashayi.
“Ngifuna ukwenza isiqiniseko sokuthi ukulethwa kwezidingo zomphakathi akuphazanyiswa yizinkinga ebezingalungiseka uma kukhulunywa nezinyunyana ezimele abasebenzi.”
UNdunankulu uMnuz Willies Mchunu uthe kuwumsebenzi kahulumeni ukwenza isiqiniseko sokuthi uyasilungisa isimo sokungalingani kobulili uma kuqashwa.
UDkt Mkhize uke waba ngumqondisi -jikelele ehhovisi likaNdunankulu waseMpumalanga ngo-2012 -2015. Ngaphambi kwalokho uke waba nguMqondisijikelele ophikweni olubhekelele abesifazane, izingane nabantu abakhubazekile phakathi ngo-20102012 eKZN.
Uke waba nguMqondisi okhulu ophikweni lwamalungelo esintu ehhovisi likaNdunankulu waKwaZulu-Natal ngo-20052009. Ngaphambi kwalokho wayengumqondisi ophikweni olufanayo ngo-2002-2005.
I-IFP ithe nakuba ikwamukela ukuqokwa kwakhe kodwa inokukhathazeka ngezinsolo zenkohlakalo asolwa ngazo.
Okhulumela iqembu, uMnuz Blessed Gwala, uthe uDkt Mkhize wagunyaza ukuthi kube nesikhumbuzo sowayenguMengameli, uDkt Nelson Mandela, ngo-2013 umcimbi wabiza u-R70 million.
“Ngemuva kokuthi uMgcinimafa kazwelonke efake isikhalo ngalokhu uDkt Mkhize waphenywa ngoKlebe. Singajabula ukwazi ukuthi kungani ashiya kulesi sikhundla ngaphambi kokuthi kuphele inkontileka yakhe,” kusho uGwala.
Ngakolunye uhlangothi i-DA igxeke isitatimende esithunyelwe yihhovisi likaNdunankulu ngokuqokwa kukaDkt Mkhize ikhala ngokuthi sinokubukela phansi abesifazane.
UMnuz Francois Rogers we-DA esiShayamthetho uthe uma kuthiwa izindaba eziconsisa amathe zokuqokwa kukaDkt Mkhize kukhombisa ngokusobala ukuthi abesifazane babukelwa phansi kuhle kwabantu abangakhaliphile ababekwa ezikhundleni ngoba bebahle.
Uthe abakwamukeli ukuchazwa kokuqokwa kukaDkt Mkhize njengezindaba eziconsisa amathe kuyinyanga yabantu besifazane.
Ucele abehhovisi likaNdunankulu ukuthi baxolise ngalesi sitatimende.