Izikhalo zeSadtu ngoMnyango wezeMfundo
INYUNYANA yothisha iSadtu KwaZuluNatal isisole izikhulu zoMnyango wezeMfundo esifundazweni ngokuzicebisa ngokuhlupheka kwabafundi nothishanhloko.
Inyunyana ithe uma kuneziphepho izikole azisakhiwa kodwa kuhanjiswa amagumbi angomahamba nendlwana namathoyilethi angomahamba nendlwana aqashwayo.
UNobhala weSadtu, uNksz Nomarashiya Caluza, uthe amathoyilethi aqashwayo angenisile ezikoleni ezisenyakatho yesifundazwe.
“Kushiya imibuzo ukuthi kumane kuhanjiswe amathoyilethi okuthiwa ngosuku abiza ngaphezulu kuka-R900. Uma ubheka uhlelo lokuphucula imiphumela ka-matric oluthatha amasonto ambalwa ludla u-R50 million kodwa ungaboni ukuthi yini ekhokhelwayo ngale mali. Kuqashwa izinkampani zonogada ezihlomulayo uma kufundwa ngamaholidi uthole ukuthi uma kunabafundi abahlanganiswe esikhungweni esisodwa abafunda ngamaholidi kuba nenqwaba yonogada kodwa lutho ezikoleni,” kusho uNksz Caluza.
UMnuz Kwazi Mthethwa, okhulumela uNgqongqoshe wezeMfundo uMnuz Mthandeni Dlungwane, unxuse inyunyana wathi ayingakhulumi nomnyango isebenzisa abezindaba.
“Into eseqhulwini esiyenzayo ukuhlinzeka ngemfundo asigxilile kumathenda. Sizoqhubeka futhi sisebenzisane nazo zonke izinhlaka okubalwa neSadtu,” kusho uMthethwa.
UNksz Caluza uthe kunenqwaba yezikole ezibanjelwe u-30% kuya phezulu wemali okumele ziyithole okungacaci ukuthi ishonaphi.
“Kunezikole ezithole u-R90 000 ekubeni bekumele zithole cishe u-R489 000. Othishanhloko bathwele kanzima bagcina sebesebenzisa imali yabo,” kusho uNksz Caluza.
Uthe umnyango ubuye uqole izikole ngokungakhokheli abafundi abangenazo izinombolo zomazisi.
“Uthola ukuthi isikole sinabafundi abangu-1 000 kodwa umnyango uxhasa abangu-400. Izincwadi bayazithola kodwa lutho uxhaso okumele baluthole. Sazi ukuthi ezikoleni akudingeki umfundi abe nenombolo kamazisi kodwa uthathwa ngekhadi lasemtholampilo,” kusho uNksz Caluza.
Uthe bazoqhubeka bakhulume ngalezi zinto uma kunesidingo bangene emgwaqweni.
“Sizoqhinqa emahhovisi omnyango noma singene emgwaqweni. Umnyango kumele ngabe uxhasa umfundi ngamunye ngo-R1 242 ezikoleni ezingo-Quintile 1 kuya ku-3 kodwa ubaxhasa ngo-R955 ngonyaka uphambana nemigomo ebekwe ngumnyango kazwelonke,” kusho uNksz Caluza.