I-DA iphakamise ukuthi iMeya yeTheku ishenxe esikhundleni
I-DA eThekwini isiphakamise ukuthi iMeya yoMkhandlu weTheku, uNkk Zandile Gumede ishenxe esikhundleni ngoba imsola ngokwehluleka ukuphatha umasipala.
Izolo iDA iqhinqe ngaphandle kwaseCity Hall lapho izwakalise ukukhathazeka kwayo ngezinto ezenzeka emkhandlwini kubalwa ukuthengwa kwezinja, izimoto zezempi zamasosha nokuhamba kwezikhulu ezinamava. I-DA iqhube lo mkhankaso wayo ngaphambi kokuba kuqale umhlangano wamakhansela omkhandlu.
Umholi wekhokhasi yeDA eThekwini, uMnuz Zwakele Mncwango, uthe sebekhathele ukuthula bebona kudlalwa ngemali yabakhokhibentela emkhandlwini ngaphansi kobuholi bukaNkk Gumede.
Uthe bafuna umphakathi wazi ukuthi kuqhubekani ukuze ungababuzi ukuthi babethuleleni. Uthe bafuna kwenziwe uphenyo futhi nge-Essence Festival lapho besola khona ukuthi kudliwe izimali.
Ukuqhinqa kwamalungu e-DA ngaphandle eCity Hall kugcine sekujoyinwa nangamalungu e-IFP.
Umholi wekhokhasi ye-IFP eMkhandlwini weTheku uMnuz Mdu Nkosi uthe yize benezikhalo ngezinto ezenzeka emkhandlwini kodwa abasho ukuthi imeya ayishenxe esikhundleni.
“Uma i-DA ithi imeya ayiphume okwayo lokho kusho ukuthi inobufakazi bezinto ekhuluma ngazo thina asinabufakazi obubambekayo esingama ngabo,” kusho uNkosi.
Uthe bayaluseka uphenyo olujutshwe imeya nemenenja yomkhandlu uMnuz Sipho Nzuza.
“Phezu kophenyo lo mkhandlu nami sengibhalele uMvikeli woMphakathi u-Advocate Busisiwe Mkhwebane ngimcela ukuthi enze uphenyo ngezinsolo ezibikwa eThekwini,” kusho uNkosi.
Okhulumela imeya, uMnuz Mthunzi Gumede uthe isenzo seDA sayizolo sihlobene nomkhankaso wayo kazwelonke wokulwisana nentando yabantu nohulumeni okhethwe ngokwentando yabantu.
“Selokhu kwathi nhlo i-DA ayikaze ivumelane nohlelo lokuthuthukiswa komphakathi yingakho ihlezi ilwisana noMeya, ayimfuni uhulumeni oholwa ngumuntu omnyama ngoba iyazi uzokhipha abantu abamnyama enhluphekweni,” kusho uGumede.