Kuzobabhedela abagwazela izincwadi
INHLANZI izoshelwa amanzi kwabagwazela ukuthola izincwadi zokushayela njengoba uNgqongqoshe wezokuThutha, ukuPhepha nokuXhumana koMphakathi uMnuz Mxolisi Kaunda ememezele ukuthi kuzoqiniswa ezobuchwepheshe ezikhungweni zokuhlolelwa ukushayela, ukuze kuliwe nenkohlakalo.
Ukusho lokhu ngesikhathi evakashele isikhungo sokuhlolelwa ukushayela esiseRossburgh eThekwini izolo.
“Ngeke sibabekezelele abantu abenza izenzo zenkohlakalo ezikhungweni zethu zokuhlolelwa ukushayela.
“Njengenye indlela yokulwa nenkohlakalo, sithuthukisa ezobuchwepheshe ukuqapha ngelokhozi zonke izinhlelo ezenziwa ezikhungweni zethu,” kusho uKaunda.
Inhloso yokuhambela kukaNgqongqoshe kulesi sikhungo bekungukuxoxa namalungu omphakathi afaka izicelo zezincwadi zokufundela ukushayela nezokushayela, nokubheka izindlela ezingasetshenziswa ukulwa nenkohlakalo kulezi zikhungo.
“Ngokuvakashela izindawo zethu zokusebenza, sihlose ukukhuphula izinga lokunikezwa kosizo emphakathini.
“Sifuna ukwenza isiqiniseko sokuthi abantu bathola usizo ngendlela enobuntu futhi ngokushesha,” kusho uKaunda.
Uveze ukuthi sekuhoxiswe izincwadi zabafundela ukushayela ezingu-146, nezokushayela ezingu-86 kulesi sifundazwe okusolakala ukuthi zinikezwe ngendlela engafanele.
Lokhu kwenzeke eminyakeni emithathu edlule, uphenyo oluqhutshwa yiPublic Transport Enforcement Services noPhiko lwamaphoyisa oKlebe ngalezi zincwadi, alukaphothulwa.
Kube nenqwaba yezikhalo ebezivela kumalungu omphakathi, abanye bekhononda ngokuma kolayini isikhathi eside bengalutholi usizo ngokushesha uma bezofaka izicelo zezinsuku zokuyohlolwa.
“Sikuzwile okushiwo ngamalungu omphakathi, siyathembisa ukuthi sizobhekana nakho ngokushesha, ukuqinisekisa ukuthi amalungu omphakathi athola usizo ngokushesha,” kusho uKaunda
Lesi sikhungo singesinye sezikhungo ezinkulu kulesi sifundazwe njengoba sinikeze izincwadi zokushayela ezingu-64 546 ngonyaka wezimali odlule.
Babalelwa ku-21 074 abafake izicelo zokufundela ukushayela kulo nyaka wezimali.
Ngenyanga edlule kuboshwe ohlolela ukushayela esikhungweni esiseDundee, wakhipha inhlawulo ka-R8000 ngenkohlakalo eyenzeke kulesiya sikhungo.
Babili abahlolela ukushayela ababoshiwe kuMasipala wasoPhongolo nyakenye, bagwetshwa iminyaka engu-10 umuntu ngamunye, engu-5 kuyo yalengiswa.