Kusale umsolwa enkundleni bedudulana namaphoyisa
KUSHONE oyedwa ngesikhathi isigejana samadoda abehlome ngezibhamu, ebesizama ukubamba inkunzi esitolo sabokufika, sitholalana phezulu ngenhlamvu namaphoyisa eChatsworth ngoMsombuluko ebusuku.
Okhulumela amaphoyisa KwaZulu-Natal, uLt Colonel Thulani Zwane uthe amadoda angu-7 agasele esitolo sabokufika esisemgwaqweni uNomzamo Mandela, eWelbedacht East, akhomba umnikazi wesitolo ngezibhamu ngaphambi kokushaqa imali nama-airtime.
“Amaphoyisa athintwe abathile, afika ngokushesha. Abasolwa badubule usomabhizinisi esifubeni, ngaphambi kokuba bavulele ngenhlamvu bebhekise emaphoyiseni,” kusho uZwane.
Usomabhizinisi uphuthunyiswe esibhedlela. Amaphoyisa aphendule ngenhlamvu, oyedwa kubasolwa washonela lapho.
Abanye abasolwa bazame ukubaleka kodwa uphiko lwamaphoyisa iFlying Squad nolwezinja, bahlala ezithendeni zabo. Ngosizo lomphakathi, kuthiwa abasolwa ababili batholwe amaphoyisa bebhacile emzini oseduze nalapho kubanjwe khona inkunzi.
“Abasolwa ababili baboshiwe, oyedwa kubo obenamanxeba okudutshulwa uphuthunyiswe esibhedlela esiseduze lapho elashwa khona egadiwe,” kuqhuba uZwane.
Kuthiwa abasolwa abane basagcwele amathafa, kuvulwe icala lokubamba inkunzi kuhlonyiwe nelokuzama ukubulala.
UZwane uthe abasolwa ababili ababoshiwe baneminyaka ephakathi kuka-17 no-19. Kulindeleke ukuthi bavele eNkantolo yeMantshi yaseChatsworth maduze
UKhomishana wamaPhoyisa osabambile esifundazweni, uMajor General Bheki Langa, usishayele ihlombe isenzo samaphoyisa.
“Sesike sazixwayisa izigebengu ukuthi zingavuleli ngenhlamvu zibhekise emaphoyiseni uma sezibanjiwe kodwa zizinikele kuwo. Amaphoyisa aqeqeshiwe ukuthi azivikele uma ehlaselwa yizigebengu,” kusho uLanga.
Uthe abaphenyi bathungatha abasolwa ababalekile.