Lisuliwe enkantolo elesosha lebhomu
LISULIWE eNkantolo eNkulu eThekwini icala lesosha obekuthiwa labulala inkosikazi yalo ngokumqhumisa ngebhomu eManzimtoti ngo-Agasti 2015 ngemuva kokuthi sekutholakele ukuthi selishonile.
UMnuz Joel Mohoasa bekufanele avele enkantolo ngoMsombuluko kodwa kwavela izindaba zokuthi ubefihlwa ngoMgqibelo odlule.
Kuthiwa ushone engozini yemoto ngesonto eledlule.
Umqondisi ehhovisi labashushisi KwaZuluNatal, u-Advocate Moipone Noko, enekela inkantolo uthe: “Esingakuqinisekisa wukuthi umsolwa kulolu daba ushonile ngakho icala ngeke lisaqhubeka.”
Eminye iminininwane ngokushona kwakhe ayizange ivezwe enkantolo.
UMohoasa ubebhekene necala lokubulala inkosikazi yakhe, uLesego Mohoasa, emzini wabo ngo-Agasti 30, 2015.
UNkk Mohoasa naye wayesebenza embuthweni wamasosha, ehhovisi eliseThekwini.
Ngokusho kombuso enkantolo kwavela ukuthi laba babanga indaba yemali, uMohoasa wajikijela inkosikazi ngebhomu. UNkk Mohoasa waphuthunyiswa esibhedlela iNetcare Kingsway, washonela khona.
Izingane zabo ezincane ezimbili zazikhona endlini ngesikhathi kwenzeka lokhu.
Umsolwa kwavela ukuthi uzimisele ngokuphika icala.
Ummeli wakhe, uMnuz Paul Jorgensen, wathi inkosikazi kaMohoasa wayehlukumeza indoda yakhe, eyishaya futhi wake waze wayithela nge-brake fluid.
Kwavela nokuthi kwakunenqwaba yamacala uMohoasa ayekade eyibeke inkosikazi yakhe okumhlukumeza. Wayephinde awasule amacala, ethi baxoxisene.
Ngokommeli kaMohoasa inkosikazi iyona eyaqhumisa ibhomu.
UMohoasa ubengaphandle ngebheyili.