Zingase zingayitholi impesheni izikhulu
ZINGASE zingayitholi impesheni yazo izikhulu ezaxoshwa kwa-SABC oMnuz Hlaudi Motsoeneng noMnuz James Aguma njengoba ibhodi lakwa-SABC lithe bazothathelwa izinyathelo zomthetho ngezinqumo abazenza kule nhlangano.
Lezi zindaba zivele izolo ngesikhathi uSihlalo weBhodi le-SABC osabambile uNkk Khanyisile Kweyama eyochaza ngomsebenzi wabo ekomidini elibhekele ezokuxhumana ePhalamende. Utshele amalungu ePhalamende ukuthi bakhulume nabameli ukuthola ukuthi zingajeziswa kanjani izikhulu ezathatha izinqumo eziphambelene nomthetho wokuphatha i-SABC nomthetho kahulumeni.
“Sikhuluma nabameli bethu ngodaba lwezikhulu ezenza okuphambene nomthetho wokuphatha kwa-SABC. Sifuna zibekwe amacala ukuze zijeziswe ngokuphazamisa uzinzo kule nhlangano,” kusho uNkk Kwenyama.
Uthe isinqumo sikaMotsoeneng sokuthi kudlalwe u-90% womculo nezinhlelo zethelevishini ezididiyelwe kuleli ulahlekisele i-SABC ngo-R183million kwithelevishini no-R29million emsakazweni ngenxa yokungabikho kwezikhangiso.
Uthe kulahleke no-R72million okhokhelwe abantu bangaphandle kwakuleli akade sebenesivumelwano sokuthi i-SABC izodlala umculo wabo nezinhlelo zabo kuthelevishini.
“Sesiqalile ukucubungula udaba lokukhokhwa kwempesheni kaMotsoeneng no-Aguma ngoba singase sibathathele izinyathelo zomthetho,” kusho uNkk Kweyama.
UMotsoeneng waxoshwa kwaSABC emuva kokulahlwa yicala lokungaziphathi kahle.
U-Aguma wasula emsebenzini ngaphambi kokuthi aqondiswe ubugwegwe.
Uthe i-SABC isiphumile enkontilekeni yayo neLornavision ne-ANN7. “Imisiwe nenkontileka ye-SABC noMnuz Sekela Xabiso ngenxa yokuthi kwayona yakhishwa ngaphandle kokulandela umthetho. Inkontileka ye-SABC neMultiChoice isazocutshungulwa ukubheka ukuthi i-SABC ihlomula ngani kuyo,” kusho uNkk Kweyama.
Uthe ezinye izinkontileka zizobhekwa wuphiko lwamaphoyisa abheka amacala abucayi nathinta imali i-Special Investigations Unit (SIU).
USihlalo wekomidi elibhekelele ezokuxhumana ePhalamende uMnuz Humprey Maxegwana uthe bathole izicelo ezingu-362 zabantu abafuna ukuba kwibhodi le-SABC kanti kuzohlungwa ngesonto elizayo.