Umnotho awuphathwe ngabasebenzi: Dlamini
UMENGAMELI weCosatu, uMnuz Sdumo Dlamini, uthi umnotho kufanele uphathwe ngabasebenzi ngoba uma uphethwe ongxiwankulu kudilizwa abantu ngaphandle kwezizathu ezibonakalayo.
UDlamini usho lokhu emuva kokuthi esinye sezitolo ezinkulu iPick n Pay imemezele ukuthi bawu-3 500 abasebenzi abazodilizwa ngenxa yokungangeni kwenzuzo eyanele ebhizinisini.
“Sikholwa wukuthi umnotho kufanele uphathwe ngabasebenzi ngoba basebenza kanzima kodwa ongxiwankulu babadiliza kalula. Aseneme neze ukuthi ePick n Pay kuzodilizwa abantu abawu-3 500 ngoba imindeni eminingi izolala ingadlile. Sifisa umnotho ubuyele ezandleni zabasebenzi,” kusho uDlamini.
Uthe bazolwa nomkhuba wezinkampani ezinkulu ezivele zikhale ngenzikamnotho nokungangeni kwenzuzo uma zifuna ukudiliza abasebenzi.
“Sidinga uhulumeni angenelele odabeni lokudilizwa kwabasebenzi futhi nezinkampani zibe nemali eziyibeka eceleni ezosiza abantu uma bedilizwa. Kufanele bahlonyiswe ngamakhono azothuthukisa impilo yabo. Kufanele izinkampani ezingenisa imali kuleli zifakwe ngaphansi kukahulumeni ukuze abantu bangadilizwa kalula,” kusho uDlamini.
Uthe abaqashi kufanele bafunele abasebenzi eminye imisebenzi hhayi ukuthi babadilize.
Isikhulu esiphezulu sakwaPick n Pay, uMnuz Richard Brasher, uthe akukho akade bezokwenza ngaphandle kokudedela u-10% wabasebenzi babo ukuthi bathathe umhlalaphansi.
“Emuva kokubona ukuthi ibhizinisi alenzi kahle sifinyelele esinqumeni sokubadiliza. Siqale ngo-Ephreli uhlelo lokuthi ofuna ukuthatha umhlalaphansi asheshe asazise. Besinezindleko eziphezulu kanti nenzuzo ibingangeni. Ukudilizwa kwabanye abasebenzi kusho ukuthi sizoqhubeka nebhizinisi kahle nezindleko zethu ngeke zisihlule,” kusho uBrasher.
Uthe bazosiqapha ngeso lokhozi isimo sezohwebo ezitolo zabo ezehlukahlukene ukuze bakwazi ukutshela abanikazi bamasheya ukuthi isinqumo sokudiliza abasebenzi sibe nomthelela onjani ebhizinisini ngo-October.