Isexwayiso sikaKganyago ngomnotho

UMPHATHI weBhange loMbuso, uMnuz Lesetja Kganyago, uthe ngeke umnotho ukhule uma kungadalwa amathuba omsebenzi amasha futhi nohulumeni engezi nemithetho ecacile ezofukula izimayini nezolimo.

UKganyago ubekhuluma namalungu ekomiti lezeziMali ePhalamende izolo.

“Sisengcupheni yokungena kwinzikamnotho uma uhulumeni eqhubeka nokungacacisi ngemithetho ethinta ezolimo nezimayini. Uma abantu bengazi ukuthi kwenzekani emkhakheni othile baba manqika ukutshala imali. Lokhu kusho ukuthi umnotho wethu ngeke ukhule ngezinga esililindele,” kusho uKganyago.

Uthe uhulumeni kufanele eze nemithetho ecacile ukuze abatshalizimali bagqugquzeleke ukuthi bafake imali yabo emnothweni wakuleli.

Uzwakalise ukukhathazeka kwakhe ngeNingizimu Afrika neVenezuela okuyiwona kuphela amazwe abhekene nenzikamnotho yize isimo somnotho sikhombisa ukuthuthuka kwamanye amazwe.

Ebuzwa yilungu le-EFF uMnuz Floyd Shivambu ukuthi ngabe iBhange loMbuso lizimele yini kwazise abanikazi bamasheya bahlala emazweni aphesheya kwezilwandle, uKganyago uthe lizimele ibhange futhi abazophazamisa lokho bazolwa nabo.

“IBhange loMbuso liphethwe nguhulumeni wakuleli ngoba nguye othola u-90% wenzuzo eyenziwa yibhange. Lizimele futhi ozimisele ukuphazamisa indlela elisebenza ngayo kumele alindele impi,” kusho uKganyago.

Uthe uzokwenza konke okusemandleni ukuthi amandla emali angabi phezulu ngoba kuhlukumezeka abampofu uma sekubiza yonke into ezweni.

“Kungumsebenzi wami ukuqinisekisa ukuthi amandla emali asesimeni esamukelekile. Imalimboleko akufanele imbe eqolo ngoba abampofu yibona abazwela kakhulu. Ngizolivikela nerandi kubantu abaganga ngalo. Kumele bajeziswe abasolwa ngokudlala ngalo ngoba uma kungenziwa lutho nabanye bazobona ukuthi kudlalelwa eNingizimu Afrika,” kusho uKganyago.