Kuboshwe omashonisa abangu-11
ZIBAKHALELE omashonisa abangu-11 abasolwa ngokucuthela abantu abahola impesheni babaqole imali.
Esitatimendeni esithunyelwe yinhloko yezokuxhumana kwaSASSA kuleli, uMnuz Paseka Letsatsi, kuvela ukuthi laba basolwa baboshwe, eNigel, eGoli, izolo ekuseni. Kuboshwe abesifazane abathathu namadoda ayisikhombisa abaneminyaka ephakathi kwengu-30 no-50.
Kuthiwa laba baboshwe ngokwehlukana eduze kwemishini yokukhipha imali nasezitolo.
ULetsatsi uthe abasolwa batholwe nemali eningi, amakhadi akwaSASSA angaphezu kuka-900 ahambisana nezinombolo zawo eziyimfihlo.
Laba baphinde batholwa nezibhamu ezimbili ezisazohlolwa ngamaphoyisa ukuthi zisemthethweni yini.
Abanye abasolwa kuthiwa bakwazile ukubaleka ngezimoto ezine kodwa amaphoyisa asezithendeni zabo.
Kulo mkhankaso wamaphoyisa akwaSAPS nonogada bakwaSASSA kuphinde kwashaqwa nemoto kanokusho ebisetshenziswa ngabasolwa.
Kuthiwa abasolwa bebebolekisa ngemali kwabahola impesheni bese bethatha amakhadi abo okuhola nezinombolo zemfihlo.
Lokhu kuthiwa bekusho ukuthi njalo ngenyanga umuntu ubezolanda imali yakhe yomholo kumashonisa ngemuva kokuthi sekubanjwe imali umashonisa athi uyayikweletwa.
ULetsatsi uthe obekwenziwa yalaba basolwa kuphambene nomthetho iNational Credit yango2005.
Uveze ukuthi umashonisa ubeboleka umuntu ohola impesheni imali ngaphandle kokuthi abheke ukuthi uyakwazi yini ukuyibuyisa nokugcina kwenza ukuthi abantu babe sezikweletini.
AbakwaSASSA bashayele ihlombe ithimba elibophe abasolwa.
“Siyabaxwayisa abantu abahola impesheni ukuthi bangawasebenzisi amakhadi abo ukutsheleka imali ngoba akukho amthethweni,” kusho uLetsatsi.
Abantu bayanxusa ukuthi bathinte amaphoyisa noma bashayele inombolo yakwaSASSA ethi 0800 60 1011 ukuze babike ukubolekiswa ngokungemthetho kwemali.
“Sizoqhubeka nokubopha abasolwa kuzwelonke kuze kube bonke bayavalelwa,” kusho uLetsatsi.