Asivule amehlo ngesikuthola kwezokuxhumana
KUYIQINISO elingephikwe ukuthi singumphakathi kumele sihambisane nokuthuthuka kobuchwepheshe besimanje. Kulobu buchwepheshe kukhona nezinkundla zokuxhumana okukhona kuzo iFacebook, Instagram,Twitter ukubala ezimbalwa.
Kulezi zinkundla zokuxhumana abantu bathola nolwazi oluzobasiza ukuthuthukisa amabhizinisi abo, imisebenzi, bathole omaqondana nokunye.
Yize zisiza izinkundla zokuxhumana kepha zibuye zibe nobungozi obufaka abantu enkingeni.
Imibiko yakamuva mayelana nentokazi yaseBloemfontein uNksz Princess Mahlangu, osinde emlonyeni wengwenya ekade ecabanga ukuthi usethole amadlelo aluhlaza kwezokumodela, iphonse inselelo yokuthi kumele sonke sivule amehlo ngesikuthola ezinkundleni zokuxhumana.
Le ntokazi icishe yangena ogibeni lokushushumbiswa njengesigqila socansi emva kokuthi ithole enkundleni yezokuxhumana ukuthi kunabathile abafuna abesifazane ukuthi bazongenela uMiss United Countries SA Pageant eMalaysia.
Ngokwemibiko, le ntokazi isizwe ukungenelela kwamaphoyisa asebenza ngokubambisana nawaseMalaysia, emva kokutholakala kokuthi umqhudelwano wonobuhle obekukhulunywa ngawo yinto engekho.
Okutholakele wukuthi bekuhlelwa ukuthi ishushumbiswe nabanye besifazane ukuze bayoba yizigqila zocansi ezindaweni ezihlelelwa lo msebenzi eMalaysia.
Nakuba kujabulisa ukuthi uNksz Mahlangu ugcine ephunyukile emlonyeni wengwenya, umbuzo osalayo ngothi bangaki abanye besifazane asebake baholelwa ophathe ngalolu hlobo nangezinye izindlela kwagcina kumosheke impilo yabo?
Njengoba kuqala u-Agasti, okuyinyanga yabantu besifazane, silindele ukuthi yande imikhankaso ezonikeza imbokodo izindlela zokuzivikela nokuqwashiswa ukuze ibone ugibe esuke ilengela kulona.
Sengathi uphenyo lwamaphoyisa lungasiza ngokuvundulula nabanye abesifazane okungenzeka ukuthi abazange babe senhlanhleni yokuthi basheshe batholakale njengoba kwenzeke kuNksz Mahlangu.