Uhulumeni makacabangele nabagilwa
Okhathazekile THALENTE PATRIC MVUBU MHLELI: Abantwana bakwaIsrael baphuma eGibhithe ezweni lobugqila lapho babehlushwa khona nguFaro. Bakhala kuNkulunkulu ngoba bebona usizi, inhlupheko nobugqila behlushwa uFaro nabantu bakhe.
Bakhala uNkulunkulu wabazwela baphuma beholwa nguMose. Ngesikhathi bephuma bahlala ehlane iminyaka eminingi. Bathe sebesehlane bakhala futhi kuNkulunkulu ngoba babebabele eKhenani izwe lesethembiso.
Ngebhadi uMose umholi wabo akabange esafika eKhenani ezweni lesethembiso waphelela ehlane. Ngokunjalo nabalwela inkululeko abaningi kukhona abangazange besafika ezweni lesethembiso okuyinkululeko baphela ehlane, ihlane-ke okuyisekudingisweni. Nathi bantu abamnyama sihlushwe yizizwe ezimhlophe. Kwazatshalazwa kwaze kwafikwa enkululekweni. Esikhundleni sokudla izithelo zenkululeko manje sesithwele kanzima siyahlukumezana ikakhulukazi thina bantu abamnyama. Kusuka umhlukumezi ahlukumeze umhlukunyezwa. Uma eseboshiwe umhlukumezi lokho kusuke kusho ukuwela ngelibanzi kuyena. Okokuqala uzophepha olakeni lomphakathi osuke ufuna ukumbulala ngesenzo sakhe. Okwesibili umhlukumezi uphepha nasolakeni lomndeni womgilwa. Esitokisini uzothola ukudla okukhokhelwe yintela yomhlukunyezwa. Uma kufike usuku lokuvela kwakhe enkantolo uyacatshangelwa ngokuthi makatholelwe ummeli wamahhala.
Kuthiwa phela naye kumele abe nommeli ngoba unamalungelo awanikezwe nguMthethosisekelo. Ngesikhathi ehlukumeza abanye abantu akuthi shu kuhulumeni. Laphayana enkantolo umelwe ngummeli amunikezwe nguhulumeni. Ngokunjalo nomhlukunyezwa uzobizwa enkantolo ahlukunyezwe ngummeli kammangalelwa emgwexa ngemibuzo ebuhlungu, kubuzwa ukuthi wambona yini ummangalelwa ekwenza lokho.
Umhlukumezi uzothi esuka athethwe yicala aphume kalula. Bakithi ngiyakuqonda ukuthi nezinkantolo zisuke zenza umsebenzi wazo, ngokunjalo nommeli kammangali usuka enza owakhe nokubuza ummangali. Into okumele siyikhumbule wukuthi umhlukunyezwa mhlawumbe udlwenguliwe manje kumzwisa ubuhlungu ukulokhu edlalwa njengebhola enkantolo. Kwesinye isikhathi mhlawumbe ilungu lomndeni lidlwenguliwe, laklinywa labulawa mhlawumbe lashiswa ngenhloso yokucima ubufakazi. Leli lungu lomndeni mhlawumbe lifihlwe ngesonto eledlule, konke kusekusha emndenini kodwa uyoshushiswa kwawona ube ulahlekelwe. Bakithi ngoba uhulumeni uyakwazi ukuphatha ntofontofo abaphuli bomthetho ngokubavikela makenze okufanayo nakubagilwa.
Abahlukunyezwayo mabaholelwe nguhulumeni kuncike emonakalweni obavelele abayise nakubeluleki bengqondo ukuze belulekwe futhi abondle uhulumeni ngoba balahlekelwe. Angikulindele ukuthi uhulumeli athi ayikho leyo mali. Izoze ingabi bikho yenziwa yini ngoba uyifakile kuziphulamthetho? Bakithi angilwi nabafowethu ababoshiwe kodwa nohulumeni makenze okufanayo kubahlukunyezwa. Yisemkhulu Nzimande. EPORT SHEPTSONE