I-M-Net nolunye uhlelo lwemishado yabantu
SITHEMBISA lukhulu isiteshi i-M-Net njengoba ngoSepthemba kuzoqala uhlelo lwemishado iThe Wedding Bash (ers).
Yize lungakaziwa usuku okuzoqala ngalo lolu hlelo kodwa namhlanje abezindaba bamenyiwe eGoli ukuzokhonjiswa okuzobe kwenzeka kulona.
Amasonto angu-13, abantu bakuleli bazokhonjiswa imishado ezobe ihanjelwa osaziwayo bebuka izinto ezahlukene.
Intokazi eyake yathatha isicoco sikazime wakuleli uCindy Nell, umethuli wezinhlelo uDenise Zimba, umpheki wakuleli osezakhele igama uSiba Mtongana nensizwa ehlela imishado empilweni yayo yangempela uZavion Kotze bazobonakala kulolu hlelo bencoma noma begxeka imishado abayihambelile.
UCindy uzobe ebheka ingubo kamakoti nokuthi uziphaqule kanjani, uDenise uzobe ebheka imfashini kubantu abazobe behambele lowo mshado.
USiba yena uzobe ebheka ukudla okwahlukahlukene okuzobe kudliwa, bese uZavion acubungule izinhlelo zawo ukuthi zizobe zihamba kanjani nokuthi kuhlotshiswe kanjani.
Ekupheleni komshado bayobe sebehlangana bekhuluma ngezinto abazithandile nabangazithandanga ngalowo mshado abakuwo.
UGavin Wratten omunye wabasunguli balolu hlelo uthe luhlukile kunoluhamba phambili kuleli i-Our Perfect Wedding eyenza kahle kuMzansi Magic.
“Osaziwayo abazohambela imishado kuzothi uma sebekubheke konke emishadweni engu-24 abazoyihamba bese bekhetha engu-6, ababone ihamba phambili. Kula kuyobe sekuhlungwa futhi kubhekwe owodwa odle umhlanganiso. Abanikazi bomshado ozowina bayobe sebezihambela nomklomelo ka-R250 000 ongukheshi neminye imiklomelo,” kuchaza uGavin.
Uthe amakhamera azobe eseduzane nosaziwayo abazohambela imishado ukuze kuzwakale ukuthi bacabangani ngomshado usaqhubeka.
“Kuzobhekwa kakhulu ukuthi bajaja kanjani. Bonke abasibizile emishadweni yabo kumele bazithembe uma behlela umshado wabo njengoba imibono ezoqhamuka izobe ihlukene, eminye ingase ingabaphathi kahle,” kuchaza yena.
Uthe kulolu hlelo bazohambela imishado yezinhlanga ezahlukene zabantu bakuleli ehlelwa emahlathini, olwandle, ezingadini nasemapulazini.
Ugcizelele ukuthi yize sebeqalile ukushutha uhlelo kodwa izicelo basazamukela zabantu abafuna ukuvakashelwa emishadweni yabo.