Uzovakashela izindawo noBenjamin Dube
INTOKAZI eyakhala ngaphansi ohlelweni ama-Idols SA ngo2015 nesingene ekulingiseni uMmatema Moremi, izovakashela izindawo ezehlukene zezwe nomculi wowokholo, uBenjamin Dube.
UBenjamin Dube uzobonakala amadolobheni ahlukene azobe ejabulisa kuwo abalandeli bakhe ebaculela izingoma eziku-albamu ethi In His Presence.
UMmatema uzobe esethimbeni elizohambisana noBenjamin acula naye ngokuhlanganyela ingoma ethi You Are God Alone.
Ekhuluma neSolezwe uMmatema uthe, leli thuba kudala alilindela yize ebengazi ukuthi lizoqhamuka maduzane kangaka.
“Ngijabule ngempela, angazi nokuthi ngithini. Into okwakudala ngiyifuna njengoba ngajatshuliswa ukusebenza naye nje kukodwa engicela ukuthi kube khona ingoma engimsiza kuyo,” kusho uMmatema.
Uthe ukukholwa yinto akhuliswe ngayo, ngisho esekuma-Idols wayethanda ukucula izingoma zokholo kodwa zingavulelekile kakhulu.
“Sizohambela amadolobha ahlukene okukhona kuwo eKapa, eThekwini, Kimberley, Bloemfontein nase-Eastern Cape. Bazokuya eSwaziland naseLesotho. Ngizojabulisa abalandeli bami ngengoma yami engisanda kuyikhipha ethi Ke Lerato eyenza kahle kakhulu kiiTunes,” kusho uMmatema.
Uthe ingene ezingomeni eziyishumi ezihamba phambili esontweni lokuqala iphumile .
UBenjamin Dube enkundleni yokuxhumana u-Instagram uthe, abantu abathole amathikithi abo njengoba kuwona wonke la madolobha kuyobe kuwubusuku bokudumisa.
“Kuleli sonto sizobe siseSwazini lapho uhlelo lukaNkulunkulu lusikhomba khona. Siyodumisa, sibonge uMdali ngezibusiso asiphe zona.”