ULalla noSmash Afrika ohlelweni olusha
INTOKAZI uLalla Hirayama nomsakazi weYFM othula uhlelo lwasekuseni iSmash & Grab, uSmash Afrika, bazokwethula uhlelo olusha lomculo oluzoqala ngoLwesihlanu esiya kulo kuMzansi Magic.
Uhlelo iMassive Music luzokhonjiswa kulesi siteshi ngo9.30 ebusuku.
Uhlelo luzogxila kakhulu ekudlaleni umculo wakuleli nowaphesheya kwezilwandle, luphinde lube nezingxoxo nabaculi abahlukene.
Umqondisi wezinhlelo zakwaMNet, uReneilwe Sema, uthe uhlelo luzothokozelwa kakhulu ngabantu abangathandi ukuphuma baye ezindaweni zobumnandi.
“Sizodlala izingoma ezizoshiya umbukeli efisa impinda. Usuku lwangoLwesihlanu alusezofana nakuqala. Lolu hlelo luzoba mnandi ngoba alufani nezinye izinhlelo zomculo ezikhonjiswa ngoLwesihlanu,” kusho uReneilwe.
Uthe kulo kuzobonakala abaculi becula bukhoma isonto nesonto, baphinde babe nezinkulumongxoxo nabethuli balo ngezinto abazenzayo nezibafake emculweni.
“Abethuli balo basebancane futhi bathandwa ngabantu abaningii, banomdlandla bayawuthanda umsebenzi wabo. Ukusebenzisa abantu abasebancane futhi abawazi kangcono umculo kungumqondo omuhle. Sibone ukuthi bazoluphatha kahle uhlelo,” kusho uReneilwe.
Abaculi bazobabuza ngezingoma zabo nokuthi bazisusela kuphi.
“Umculi akazofika nje acule ingoma bese kuyadlulwa kodwa sifuna ukugxila kuye sazi okuningi ngaye ngaphezu kwengoma azobe eyicula ngalolo suku, sazi ukuthi yini emenze wabhala ingoma nokuthi umculo awenzayo yini emenze wawukhetha. Sizobheka izinto ezehlukene. Abaculi sifuna benze konke okusemandleni ukujabulisa ababukeli uma bezocula esiteji, babashiye bethokozile. Isonto ngalinye umculi uzohlala esihlalweni esisibiza ngeHot Seat, la ezobuzwa khona ngezinto ezehlukene ezithinta umculo nangezinto afisa zenzeke noma zishintshwe kule ndima.”
UReneilwe uthe bazothola konke abakufunayo kulolu hlelo abathandi bomculo weJazz Junkie, Afropop, hip hop, Kwaito noma beHouse, .
Uthembise ababukeli boMzansi Magic ukuthi uLwesihlanu lwabo ngeke lusafana.