I-PSL iphoqekile ukushintsha uhla lwemidlalo yayo
INJABULO ngezinguquko ezimenyezelwe kamuva ukuthi ziyeza ebholeni lase-Afrika zishiye izinto zimapeketwane kwiPremier Soccer League (PSL) ephoqeke ukuba ilushintshe lonke uhla lwemidlalo yayo ngoba kunamaqembu ayo asemiqhudelwaneni yeConfederations of African Football (CAF).
Izinguquko eziphakanyisiwe nokugcine kuvunyelwene ngazo kukhukhulelangoqo womhlangano obuseRabat, eMorocco, ngenyanga edlule okuhloswe ngazo ukubuyisela emgqeni ibhola lezwekazi, ziphazamise izinhlelo zePSL zokukhipha uhla lwayo lwemidlalo.
Imbangela yalokhu wukwenza kahle kweMamelodi Sundowns kuCAF Champions League nokuqhubekela esigabeni esilandelayo kuCAF Confederation Cup kweSuperSport United.
Ngaphambi komhlangano obuseRabat uhanjelwe yizinkulungwane zabantu abathinteka ebholeni lase-Afrika okuhlanganisa abadlali bakudala, abaqeqeshi bamaqembu esizwe nomengameli bososesheni, iSundowns bekumele idlale neWaydad Casablanca yaseMorocco kuChampions League ngoSepthemba 8 kuya ku-10. Ngemuva kwawo lo mhlangano lo mdlalo usugudluzelwe kuSepthemba 15 kuya ku-17.
Kube yinto efanayo nakwiSuperSport kuConfederation Cup kwazise umdlalo wabo we-quarter final neZESCO yaseZambia ususukile kuSepthemba 15 kuya ku-17 kepha usuzoba ngempelasonto kaSepthemba 22 kuya ku-24.
“Ngingakuqinisekisa ukuthi uLwesine (kusasa), noma-ke angithi lingakapheli isonto, uhla lwemidlalo oluphelele luzobe selukhishiwe. Ngesikhathi iCAF yenza izinguquko ekhalendeni layo nathi siphoqelekile ukuthi senze olwethu ushintsho oluzogwema ukuthi siphazamiseke,” kusho uLuxolo September okhulumela inhlangano eyengamele ibhola elikhokhelayo kuleli.
Sekuyinto efana nesiko ukuthi kuphazamiseke imidlalo yeligi uma kukhona iqembu laseNingizimu Afrika elihamba ibanga elide emiqhudelwaneni yeCAF. Kubhekwe kakhulu ukuthi kuzoba njani kule sizini njengoba izinguquko ezinqala ekhalendeni lebhola lase-Afrika sekuvele kuqaliwe kukhulunywa ngazo.
NgoMsombuluko iPSL igcine ikhiphe uhla lwemidlalo yeMTN 8 okuyiyona vele eqalayo minyaka yonke. Imidlalo yePremiership ingase iqale ngo-Agasti 19.