Ibanga eliyisivivinyo kuSemenya
ASIKHO isidingo sokuthi uCaster Semenya azigqilaze uma eseyibambe ebangeni angalijwayele u-1500m kumaIAAF World Championship aqala ngoLwesihlanu, e-Olympic Stadium, eLondon, e-England.
USemenya oyintandokazi ekutheni abuye negolide kule midlalo ebangeni aziwa ngalo u-800m, uzobonakala okokuqala eyibambe ku-1500m ezingeni lomhlaba, okuyibanga elinezimfivilithi zakhona njengoGenzebe Dibaba waseEthiopia noSifan Hassan waseNetherlands.
Lezi zintokazi zigijima isikhathi esingaphansi kwemizuzu emithathu kuleli banga.
USemenya isikhathi anaso esihle singu-4.01.99.
NgokukaMichael “Sponge” Seme ongumqeqeshi, uSemenya akhulela kuyena wambeka ezingeni lomhlaba enqoba kule midlalo ngo-2009, asikho isidingo sokuthi azikhandle kakhulu ku-1500m.
Imidlalo yokuhlunga yabesifazane kuleli banga ingoLwesihlanu ntambama, lapho uSemenya kumele azikhombise khona ukuthi angakwazi yini ukuhamba afike kweyamanqamu.
“Yena angaba nayo inkinga kuleli banga njengoba eqala ukuligijima kuma-World Championship. Ukube kuya ngami bekuzoba ngcono ukube kuqala ibanga lakhe u-800m kodwa ngebhadi kuqala u-1500m. Uma ehlakanilphile ngeke azigqilaze akhiphe wonke amangwevu kuleli banga. Umjaho wangoLwesihlanu uzofana nesivivinyo kuyena azozihlola ngaso ukuthi ngabe uzimisele yini ngokuhamba ibanga elide kuwona,” kusho Seme.
Uthe uyakuqonda ukufakwa kukaSemenya kuleli banga kanjalo naseqenjini labesifazane le-4x400m.
“Inhloso wukutholela izwe izindondo futhi ngabe usebenzile impela uma engabuya nezimbili. Kodwa akumele akhohlwe wukuthi okumele agxile kukhona u-800m lapho wonke umuntu elindele ukuthi azidlele amahlanga,” kusho uSeme.
USemenya usanda kushaya irekhodi elisha lakuleli ku-800m ebeka u-1.55.27 kuDiamond League, eMonaco. USeme uthe angajabula kakhulu uma engagijima u-1.54. Irekhodi lomhlaba kuleli banga limi ku-1.54.68 nelabekwa uJarmila Kratochvilova waseCzech Republic ngo-1983.
Emidlalweni yango-2015 eBeijing, eChina, iNingizimu Afrika yabuya nezindondo ezintathu kuphela.
Zanqotshwa nguWayde van Niekerk ku-400m (igolide), u-Anaso Jobodwana 200m (ithusi) noSunette Viljoen ku-javelin (ithusi). Kulokhu uViljoen umemezele ukuthi uyahoxa ngenxa yokulimala. Kodwa i-Athletics South Africa ithe isazokhipha isitatimende ngalokhu.