KWE-CARLING CUP
UKAPUTENI weKaizer Chiefs, uqede ukushaya izimbangi zabo i-Orlando Pirates wayokhipha “ibhabhalazi” endaweni edumile yobumnandi eThekwini, Eyadini Lounge.
Phela uKhune nozakwabo ngoMgqibelo bebebambe endebe kabhiya, iCarling Black Label Cup ngokudlula ngo 1-0 kuBucs.
Yize bese kunokukhala ngaphandle kwenkundla ngemuva kokushona kwabalandeli ababili, kodwa ngaphakathi abadlali beChiefs babonakale beyijabulela kakhulu le ndebe bebhiyoza into engapheli.
Ngokuthola kukaPotshoza ibhasi leqembu liphume ngesikhulu isivinini kangangoba imenenja yeqembu uBobby Motaung uze waphazamisa isithangami sabezindaba ebesibanjwe umqeqeshi uSteve Komphela, emtshela ukuthi bashiywa yisikhathi.
Ngakusasa uKhune ugaxe kuTwitter isithombe sakhe ebonakala esendaweni egudle ulwandlwe esikhombisa ukuthi useGagasini.
NgoMsombuluko ebusuku abaseYadini bafake isithombe ekwi-“Monday Therapy”.
Nokho zibonakala zimnciphela izinsuku zokupepenyeka lo mdlali njengoba sekungasensuku zatshwala kuqale isizini ka-2017/2018.
Isizini entsha iyaqala ngesonto elizayo ngemidlalo yeMTN 8. Kodwa uKhune uzobuyela kuleli dolobha abonakala elithanda kungekudala njengoba iChiefs izobhekana neSuperSport United eMoses Mabhida Stadium.
Empeleni uPotshoza ubona kunento edonsela uKhune kwelikaBhanana. Sekuze kwaba kabili eqonywa izipawupete zakhona kulandelana, uMinenhle Dlamini noSibahle Mpisane. Nakhu namanje esemane ekhetha ukuyoshaywa wumoya khona. UPotshoza ukubhekile kaputeni.