UMoloi uvule izandla ngeBucs
INKAKHA eyaphinde yaba yiphini ngezikhathi zenjabulo kwi-Orlando Pirates, uTobogo Moloi, uzivulile izandla ngokubuyela kwakuchaza njengekhaya, inqobo nje uma umqeqeshi omusha okhonjwa khona ezimisele ngokusebenza naye.
Indaba esematheni kulezi zinsuku eyekusasa likaKjell Jonevret waseSweden okuthiwa uhleli ngesinqe esisodwa emsebenzini wakhe kangangokuthi obeqeqesha iqembu lesizwe laseUganda, uMilutin Sredovevic, oseke wayiqeqesha phambili iBucs, usethelekile eNingizimu Afrika ukuzoqeda konke.
Nakuba uSredovevic kuvela ukuthi ulaxaze izicelo eziningi ngoba efuna ukubuyela kwiBucs, ukuphikile lokhu ku-twitter wase eqinisekisa ukuthi usendleleni ebheke endaweni ethile okuyilapho ezofike asayine khona. Lokhu ukubhale ku-twitter ngoMsombuluko ebusuku kwathi ngoLwesibili ekuseni aqala asabalala amahlebezi okuthi usethelekile eNingizimu Afrika ngenhloso yokuzoqeda konke neBucs.
“Nami ekaMicho ngiyizwa kwabezindaba kodwa uma engifuna izandla zami zivuliwe. Ekhaya kuyohlale kusekhaya. KwiPirates kulapho ngikhulele khona. Akukho engingakwazi ngeqembu, ngakho-ke uma ngingathola ucingo oluthi angibuye ngingagxumela phezulu ngaphandle kokucabanga kaningi,” usho kanje uMoloi. UMicho, osanda kusula isigubhukane kwiChippa United ngoba kukhona abangezwananga ngakho noDan Malesela oyinhloko yabaqeqeshi kumaChilli Boys, uzwakalise ukukhathazeka ngesimo iqembu elikusona ngoba ubesethimbeni lalo lidla izicoco eziyisithupha amasizini elandelana ngaphansi kukaRuud Krol.
“Ngiyazi ukuthi umqeqeshi okhonjwa kwiPirates ulazi lonke ibhola lase-Afrika ngakho-ke uzofuna ukuthi iqembu libuyele khona. Uma lowo mqeqeshi engidinga ngikhona futhi ngikulungele ukusiza iqembu libuyele lapho kufanele ngabe likhona. Ngihleli ngilindile ukuthi ngibizwe ekhaya. Ngiyazi ngike ngamemezela phambili ukuthi sengibheke kwezinye izindawo manje ngokomsebenzi kodwa umbuzo uthi ngizohamba kanjani ngiye kweminye imizi ekhaya kube kumapeketwane?”
Ukubuza kanje kukaMoloi kuvusa eminye imibuzo nokuthi angabuyela yini kwiBucs ngemuva kwesikhathi eside ashiya kuyona. Ngesikhathi ehamba kwathiwa wayengasadingeki ngoba wayephazamisa ukusebenza kahle kuka-Eric Tinkler owayengumqeqeshi weqembu ngaleso sikhathi – okuyimibiko okungazange iqinisekiswe yimuntu. Abaphathi bePirates abafunanga ukuphawula kakhulu mayelana nokuhamba kukaMoloi njengoba esekhuluma eyokufuna ukubuyela ekhaya uma ithuba livela.