‘Sengikulungele ukudlala kwelikhulu’
UTHUMELE umyalezo ocacile kuSteve Komphela umgadli weKaizer Chiefs odlala eqenjini leMultichoice Diski Challenge, uYusuf Bunting, oqokwe njengomshayimagoli ovelele emqhudelwani iSAB Under 21 National Championships esongwe ngesonto eGauteng ngempelasonto edlule.
UBunting (19) ushaye amagoli awu12 emqhudelwaneni oqhatha izikwati eziqhamuka ezifundazweni ezehlukene. Uphinde waqokwa njengomdlali ovelele esiza iGauteng ekubeni ngompetha. UBunting ushaye amagoli amathathu, bagcine bewine ngo 4-1 kumaphenathi behlula i-USSA kowamanqamu.
“Ngicabanga ukuthi engikwenzile kuzongikhulumela kumqeqeshi, uSteve, ukuthi angibheke eqenjini elikhulu. Ngicabanga ukuthi sengikulungele ukudlala khona. Ngiyazi ukuthi akulula kodwa ngizimisele ukusebenza kanzima,” kusho uBunting.
“Ngibuke umdlalo weCarling Black Label sibhekene nePirates, inkundla (FNB) igcwele. Nami ngiyafisa ukuba kulokho. Ngikholwa wukuthi sengivuthwe ngokwanele. Kodwa akukho ezandleni zami ukuthola ithuba eqenjini elikhulu. Lapha sisebenze kahle njengeqembu, besibambisene nakuba iqembu liqokwe sekuzoqala umqhudelwano.”
UBunting ungomunye wabadlali beChiefs abashaye into ecokeme eqenjini leMultichoice Diski Challenge (MDC) ngesizini edlule. Abanye abekade eyibamba nabo uSiyabonga Ngezana noWiseman Meyiwa abanyuselwe eqenjini elikhulu. IChiefs ithwale kanzima ukushaya amagoli ngesizini ka-2016/2017 ngenxa yokungabi naye umgadli ongalibheki ipali. UKomphela kubukeka nakule sizini ezothembela kuBernard Parker, Gustavo Paez noRyan Moon phambili. UMoon, ojoyine iChiefs esuka kwiMaritzburg United ngesizini edlule, ubeyibamba eqenjini leMDC.
UBunting uqokwe esikwatini sabadlali abawu-25 abazokhempa ndawonye ngosuku olusazomenyezelwa. Kuthiwa bazothola ukuqeqeshwa, kuqokwe kubona uma kunezikwati ezizodlala abangakwazi ukungena kuzo. Obeyiphini lomqeqeshi weBafana Bafana, u-Owen Da Gama, ubengomunye wabaqeqeshi abebekade bekhetha laba badlali ngokubambisana noHelman Mkhalele noThabo Senong, opheka iqembu lesizwe lika-Under 20. “Sizozwa kubaphathi ukuthi kuzokwenzekani ngesikwati esiqokiwe kodwa nakanjani kuzokhethwa kubona uma kudlala amaqembu esizwe. Ngijabule ngezinga elikhonjiswe ngabadlali kulo mqhudelwano.”
“Mayelana noBunting, iChiefs ngiyethemba ukuthi imbonile, kumele yenze okufanele. Ungumgadli osezingeni eliphezulu,” kusho uDa Gama.
Ngempelasonto iChiefs izobhekana neChippa United emdlalweni wesihle wePremier’s Cup eSisa Dukashe Stadium, e-Eastern Cape. UBunting angase athole ithuba lokudlala kulo mqhudelwano.