Itheleke ngobuningi intsha eKZN efuna ukuculela iJoyous Celebration
IBIPHUME ngezinkani intsha yaKwaZulu-Natal izozama inhlanhla kwinhlolokhono yokuba yilungu leqembu leJoyous Celebration.
Njalo ngonyaka leli qembu uma linochungechunge lwemicimbi izifundazweni ezahlukene, liqale lithungathe abantu abasha abazoba yingxenye yeqembu. Lokhu lisuke likwenza ngenhloso yokulungiselela ukuqopha i-albhamu entsha eliyiqopha njalo ngoDisemba.
Izolo eNkosi Albert Luthuli International, eThekwini abasunguli baleli qembu namanye amalungu alo bebematasa besiza intsha ebizozama inhlanhla. Iningi layo obekungabesifazane bekucaca ukuthi banesifiso sokuba kuleli qembu njengoba abanye bebecula ngabodwana bezilungiselela. Abanye bekucaca ukuthi bafike ngezintatha njengoba bese bevule izikhafutini bedla.
UJabu Hlongwane omunye wabasunguli baleli qembu uthe, bajabule ngendlela intsha ephume ngayo, bayethemba ukuthi konke kuzohamba kahle.
Uthe enye intsha akade sebeyibonile iveze ukuthi iqhamuka eGoli, njengoba ingalitholanga ithuba ngesikhathi leli qembu lenza inhlolokhono eGoli.
NgoLwesihlanu nangoMgqibelo leli qembu kulindeleke ukuthi libe nomcimbi la lizojabulisa abalandeli balo ngomculo walo oku-albhamu yalo ethi “Heal Our Land”.
ULindelani Mkhize ongomunye wabasunguli uthe, amathikithi ezinsuku zombili zalo mcimbi asephelile.
Ukuthungathwa kwabafuna ukuba yingxenye yaleli qembu kuyaqhubeka nanamhlanje e-ICC.