Kubulawe iphoyisa nomyeni kubuka ingane
SEKUQUBUKE indida ngokubulawa kwephoyisa lesifazane nomyeni walo emzini wabo phambi kwengane yabo enonyaka eDraaihoek, e-Edendale, eMgungundlovu.
UConstable Nobukhosi Msimang (39) obesebenza esiteshini esiku-Alexandra Road, ubulewe nomyeni wakhe uMnuz Thabo Msimang (47).
Izidumbu zabo zitholwe yindodakazi yabo eneminyaka engu-15 emuva kokuzwa kuqhuma isibhamu kade ilele ekamelweni layo.
Izolo, ngesikhathi Isolezwe lihambele umndeni, bekungena amaphoyisa, izihlobo nabangani bezobhonga emswaneni.
UNkk Bongi Makhaye ongudadewabo kaMsimang uthe basebumnyameni ngokubulawa ngesihluku komfowabo nomakoti wakubo.
“Sonke simangele futhi sididekile ngokuthi kungani bebulewe. Akukho nokuthathiwe endlini okwenza singazi ngempela ukuthi bekwenzenjani,” kusho uNkk Makhaye.
Indodakazi yabo, engeke idalulwe igama ngenxa yeminyaka yayo, itshele Isolezwe ukuthi ngo-9 ebusuku ihambile yayolala ishiya abazali bayo nomfowabo behlezi ekhishini, uyise enza umphako wasemsebenzini.
Ithe ivuswe wukuqhuma kwesibhamu, kwathi sekuthulekile yaphuma ekamelweni iyobheka ukuthi kwenzenjani. Ithe umfowabo ononyaka ubehlezi kusofa.
Ngakuveranda wendlu uthe bekunesidumbu sikanina kunegazi phansi.
“Ngimthintile umama ngibheka ukuthi uyanyakaza yini ngabona ukuthi useshonile. Ubaba ubelele kude ngaphandle kwegceke naye eseshonile,” kusho indodakazi.
Uthe abazali bakhe bebehlezi bejabulile ngisho noma kukhona ubunzima ababhekene nabo.
Uthe izolo ulale bezihlekela uyise ezincoma ngokuthi uyalishaya ibhodwe njengoba bekunguyena obebaphekele ukudla kwasebusuku. Uyise ubesebenza efemini eseMgungundlovu.
Izolo ekuseni bese kuqubuke izinsolo eziningi ngokushona kwalezi zithandani. Umndeni uthe ubeke ithemba lawo emaphoyiseni.
Iphoyisa elingathandanga ukudalulwa liveze ukuthi ukubulawa kwabo kubukeka kuhleliwe futhi kungekhona ukuthi bekubanjwa inkunzi ngoba kungathathwangwa lutho nengane yashiywa ingenamyocu.
Okhulumela amaphoyisa KwaZulu-Natal, uBrigadier Jay Naicker, uthe amaphoyisa ase-Plessislaer aphenya amacala amabili okubulala. Bekungakaboshwa muntu.
UConstable Msimang kuthiwa uqale ukusebenzela umbutho ngo2009.
Isolezwe lithole ukuthi izolo bekulindeleke ukuthi aye enkantolo nommeli wakhe mayelana necala elithinta umsebenzi abebhekene nalo.
Umndeni waleli phoyisa uqinisekisile ukuthi ubezoya enkantolo izolo kodwa wathi awazi ukuthi icala limayelana nani.
Ibamba lomkhuzi wamaphoyisa KwaZulu-Natal, uMajor General Bheki Langa, lithumele amazwi enduduzo emndenini wephoyisa lathi abenze lokhu kumele baboshwe ngokushesha.