Zishe zangqongqa zilele izithandani
ZISHE zangqongqa zilele izithandani zasoThongathi okusolwa ukuthi beziphuzile zakhohlwa ukucisha ikhandlela, emjondolo ebezihlala kuwo, ngoLwesibili ebusuku.
UNksz Thandi Dlamini obebuye abizwe ngesibongo sakwaShangase nesoka lakhe uMnuz Bob Mhlongo kuthiwa bebezitika ngotshwala nabangani babo ngaphambi kwalesi sigameko kanti kusolwa ukuthi bazunywe wubuthongo ikhandlela likhanya. Kusolwa ukuthi ikhandlela belibekwe kokusapulangwe lavutha laze lokhela leli pulangwe umlilo wasabalala endlini yonke. Izidumbu zabo zitholwe embhedeni.
Umnikazi womuzi uMnuz Siya Ntetha obesebenza ebusuku ngesikhathi kwenzeka lesi sigameko uthe ufonelwe wumfana obelele endlini enkulu ethi abasemjondolo sebeshonile. “Ngiqale ngazitshela ukuthi baxinwe wukugula ngoba bebeke babika ukungaphili kodwa ngadidwa ukuthi manje bashona bobabili. Ngabuye ngachazelwa ukuthi bashile.”
Uthe lezi zithandani wazikhoselisa kulo mjondolo ngemuva kokuthi sezilale kuveranda wakwakhe izinsuku ezintathu zithi azinayo indawo yokuhlala. “Ngathi ngiphuma emsebenzini ngabafica belele kuveranda. Bathi baxoshiwe lapho kade beqashe khona basazama indawo abazohlala kuyo, angingakhathazeki bazolala kuwo uveranda, ngavuma.”
Uthe kwaze kwaphela izinsuku ezintathu bethi abakayitholi indawo yokuhlala, wabadabukela wathi abalale emjondolo abegcina kuwo izimpahla. “Selokhu bahlala la ngoJanuwari. Bengingenankinga nami ngoba bebengangihluphi ngalutho. Emini bebehamba bayocosha izinto ezilahliwe bayozidayisa.”
Uthe akazi noma bebedakiwe yini ngesikhathi kwenzeka lesi sigameko kodwa uyazi ukuthi bebephuza.
Omunye wabangani babo ongathandanga ukudalulwa igama lakhe uthe bebephuza bonke endaweni eyishashalazi abajwayele ukuphuzela kuyo. Bahlukane ebusuku. “Basishiye sisahleli bahamba ngemuva kwesikhashana ngibone ikloba lomlilo ngakhuphuka ngimemeza. Ngeshwa bese kusemuva kwendaba, umjondolo ubusushe wawela phezu kwabo. Ngiyacabanga ukuthi bese bevele beshonile,” kusho yena.
Eduze kwalo mjondolo bekunamabhodlela otshwala nezitofu ezindala ebeziqoqelwe ndawonye.
ULt Colonel Zwane okhulumela amaphoyisa kulesi sifundazwe, uthe izithandani ezineminyaka elinganiselwa ku-50 kusolwa ukuthi bezilele ngesikhathi kusha umjondolo.
“Imbangela yomlilo ayikaziwa, amaphoyisa asoThongathi ayaphenya ngesigameko,” kusho uZwane.