Umfana (5) ufakwe inhliziyo yomshini
UBE yisiguli esincane kunazo zonke e-Afrika ukufakelwa inhliziyo ewumshini (mechanical heart) umfana (5) waseNewcastle.
UMnotho Mndebele uhlale izinyanga ezine egumbini labagula kakhulu, esesimeni esibi ngaphambi kokuthi afakelwe inhliziyo yomshini, iheart ventricula assist device (HVAD). Lokhu kwenziwe esibhedlela esizimele iMaboneng Heart Institute, eNetcare Sunninghill, ngenyanga edlule ukulekelela inhliziyo yakhe ukuthi iqhubeke nokusebenza.
UDkt Viljee Jonker, udokotela wenhliziyo nobehola uhlelo lokuhlinzwa kwakhe, uthe yena nethimba lakhe bajabule ngendlela alulama ngayo uMnotho, okulindeleke ukuthi agoduke kuleli sonto. Uthe bajabule kakhulu ngoba ubesesimeni esibucayi kakhulu ngaphambi kokuthi ahlinzwe.
“Silindele ukuthi abuyele esikoleni maduze, enze yonke into ejwayelekile okulindeleke ukuthi yenziwe wumfana olingana naye,” kusho uDkt Jonker.
Noma ezokwenza izinto ezijwayelekile, kuzodingeka ukuthi aphathe isikhwama samalahle enhliziyo yakhe, uzowafaka ebhandeni elizoboshwa okhalweni noma awaphathe ngesikhwama esincane asigaxe emhlane.
Amalahle kuzofanele ukuthi ashajwe njalo emuva kwamahora ayisishiyagalombili.
Ngokusho kodokotela bakhe uMnotho, obenesisindo esiwu-17kg, uyingane encane kunazo zonke ukufakelwa le nhliziyo e-Afrika.
Ubenesifo esithikameza ukusebenza ngendlela kwenhliziyo, i-dialated cardiomyopathy (DCM). Inhliziyo isuke ingakwazi ukufutha igazi ngendlela ngenxa yokuvuvukala nokukhathala kweminye yemigudu ehambisa igazi. Ngokusho kukaDkt Jonker akulula ukusho ukuthi lokhu kusuke kudalwa yini.
Uthe uMnotho ubesohlwini lwabantu abebelinde ukuthola inhliziyo yokufakelwa kodwa ngenxa yokushoda kwezingane ezinganikela, akuvamile ukuthi itholakale kalula inhliziyo ebingalingana naye.
“Ubengena ephuma egunjini labagula kakhulu ezibhedlela ezehlukene unyaka wonke ngaphambi kokuthi ahlinzwe. Siqoke ukuthi simhlinze manje ngalolu hlelo lweHVAD ebe esalinde ukuthola inhliziyo. Uma sibuka indlela okwenzeka ngayo kuzothatha isikhathi eside kakhulu ukuthi kutholakale umuntu onganikela inhliziyo ezohambelana naye ukuze afakelwe yona,” kusho uDkt Jonker.
Okwamanje inhliziyo lena ewumshini izosiza ukuthi igazi likwazi ukufutheka nokuguduza ngendlela emzimbeni. Le nhliziyo isuke ingeke ifakwe kuwo wonke umuntu onenkinga, idinga ukuthi kusebenze umgudu wangakwesokudla.
Kulindeleke ukuthi ukufakelwa inhliziyo kumsize ukuthi akwazi ukuphinde akhuluphale ngokwanele ukuze abe sesimeni esihle uma esethola inhliziyo azobe eyinikelelwe.
UDkt Jonker uthe sekuvamile ukuthi abantu bafakelwe lolu hlobo lwenhliziyo njengoba ziqhubeka nokukhiqizwa.
“Zisetshenziswa kakhulu emhlabeni wonke ukulungiselela ukuthi kufakwe inhliziyo esuke inikelwe umuntu noma kube yiyo eqhubeka nokusetshenziswa yisiguli uma kuwukuthi ayitholakali inhliziyo.”