Bayasonga abasebenza emafemini
BASONGA ngokwenza amafemu aseCato Ridge angalawuleki abasebenzi abathi benziwa itoho isikhathi eside futhi amaholo abo ayihlazo.
Izolo abasebenzi ababili, uMnuz Sizwe Makhanya noMnuz Philani Shange, abasebenza emafemini baphinde babe ngabaholi kwiGreater Cato Ridge Industrial Commitee, banikezwe incwadi yiNkantolo eNkulu yaseMgungundlovu ebavimbela ukuba baphazamise ukusebenza emafemini.
Banikwe incwadi ngemuva kokushiswa kwamaloli amabili izolo ekuseni kwajikijelwa amanye amafemu ngamatshe.
Izolo Isolezwe likhulume nabasebenzi abebesenkantolo yaseMgungundlovu bezokweseka ozakwabo.
UMnuz Sizwe Khanyile utshele Isolezwe ukuthi abakwazi ukuyeka ukulwela amalungelo abasebenzi njengoba “bexhaphazeka”.
“Kusukela ngo2009 silwela into eyodwa yokuthi abasebenzi bangabi ngaphansi kwamalabour broker nokuthi kungabi khona umuntu ohola imali eyihlazo. Sifuna kuqashwe abantu basendaweni kungalandwa abakwezinye izindawo nakwezinye izifundazwe basebenze emafemini okumele kuhlomule abantu bomphakathi kuwo,” kusho uKhanyile. UMnuz Delani Mkhize oshayela iloli elithutha impahla kwa-Boxer uthe sebekhathele ukwenziwa amatoho futhi bakhathele ukuba ngaphansi kwamalabour broker. Uthe uneminyaka emibili eyitoho. Nabanye abasebenzi bakwezinye izinkampani ezise-Cato Ridge bakhale ngokuhlukumezeka nokuhola imali encane ngehora. Bathe bazoqhubeka nokulwa benze isimo singalawuleki emafemini.
Umqondisi wakwaBoxer, uMnuz Andrew Mills, uqinisekisile ukuthi basezinkampanini ezicele usizo eNkantolo yaseMgungundlovu kunqandwe ukuhlukumezeka komphakathi.
“Kuphoqelekile ukuthi siye enkantolo ngenxa yabantu abebephazamisa ukusebenza kwamafemu aseCato Ridge. Abasebenzi bebengasakwazi ukuya emsebenzini kucekelwa nempahla ngenxa yabantu abathize abasabisa abasebenzi baphinde bashaye nezimoto ebezidlula ngomgwaqo,” kusho uMills.
Uthe kuyadumaza ukuthi kube khona abantu abakhala ngenkampani yabo ngoba iqasha abantu bendawo futhi abanabo abasebenzi abangaphansi kwelabour broker esitolo sabo.