Abhekene ngeziqu zamehlo amaphoyisa
SIMANZONZO isimo emaphoyiseni kaMasipala weTheku abhekene ngeziqu zamehlo ngenxa yokuhlukumezana okuthiwa kunenhlese yepolitiki.
Izolo kusuke isixakaxaka kwakhona amaphoyisa aqhinqa emahhovisi akomkhulu ekhala ngokuthi kunomlingani wawo owazibiza ngamakhafula kodwa akathathelwa zinyathelo.
La maphoyisa akhale ngokuthi asetshenziswa kabuhlungu ngoba kwaziwa ukuthi abehambisana nobengumphathi wazo uKhomishana Eugene Nzama osethathe umhlalaphansi. Ngokuthola kweSolezwe, uNzama ugcine emsebenzini ekupheleni kwenyanga edlule.
Ngokwemibiko engaqinisekisiwe uNzama kuthiwa uzoxhawulwa ngo-R10 million. Iphoyisa elikhulume neSolezwe kodwa lacela ukungadalulwa ngoba aligunyaziwe ukuthi likhulume nabezindaba lithe asisihle isimo.
“Kukhona iphoyisa elimhlophe elisibize ngamakhafula salibika kodwa kuze kube manje alithathelwe izinyathelo ngoba lisondelene nabaphathi,” kusho iphoyisa.
Lithe abanikwa nezimoto zokusebenza.
“Amaphoyisa axabane wodwa aqhathwa osopolitiki, akusebenzeki izimemba eziningi azeneme,” kusho iphoyisa.
Lithi amaphoyisa abegada obeyiMeya uMnuz James Nxumalo ashaywe ngesithende.
Imenenja yoMkhandlu weTheku uMnuz Sipho Nzuza esithangamini nabezindaba ngoMsombuluko, ikuqinisekisile ukuthi uNzama uyahamba kodwa yathi ngeke ikwazi ukuqinisekisa ukuthi uzothola malini ngenxa yokuvinjwa wumgomo othinta umqashi nomsebenzi.
Okhulumela amaphoyisa omkhandlu, uSuperintendent Sbonelo Mchunu uthe udaba lwamaphoyisa akhala ngokubizwa ngamakhafula seluze lwachithwa eNkantolo yezokuLingana. UMchunu uthe laba abazama ukususa umsindo basetshenziswa umphathi wabo omisiwe.
“Umphathi walezo zimemba umisiwe ngemuva kwezinsolo zokusabisa umsebenzi wasehhovisi likaNdabazabantu ngokuthi uzombulala,” kusho uMchunu.
Uthe abakwazi ukukhala ngokuthi abanikwa izinsiza ngoba basebenza ophikweni lwezinsiza i-Support Logistics.
UMchunu uthe akunankinga emaphoyiseni wathi abasusa umsindo yidlanzana labacela ku-20, emaphoyiseni angaphezu kuka-1500.