I-DA kwelinye izinga ngokuchitha uZuma
USUNGENE kwelinye izinga umkhankaso we-DA wokukhipha esikhundleni uMengameli Jacob Zuma ngemuva kokuthi izolo inxuse iPhini lakhe uMnuz Cyril Ramaphosa ukuba eseke isiphakamiso sokuchithwa kwalo mholi.
Izolo umholi weDA uMnuz Mmusi Maimane wethule amabhokisi anamaphepha asayinwe ngabantu abathi akaphume uZuma abangaphezu kwesigidi ehhovisi likaRamaphosa ePhalamende.
Lokhu kwenzeke ngemuva kokuphuma kwe-video ezinkundleni zokuxhumana lapho uMaimane enxuse uRamaphosa ukuthi akahole amanye amalungu e-ANC ePhalamende ngokuthi kuchithwe uZuma.
Kwenzeka lokhu nje, uRamaphosa usembangweni wokungena esikhundleni sikaZuma njengoba kuyiwa engqungqutheleni kaDisemba.
URamaphosa emasontweni ambalwa edlule ugxeke amalungu abo angcolisa igama lombutho ngezizathu ezahlukene.
Kwi-video, uMaimane uthe uLwesibili uzonikeza amadoda nabesifazane abanesibindi kwiANC ithuba lokuchitha uZuma. NgoLwesibili kuzodingidwa isiphakamiso samaqembu aphikisayo sokuba kuchithwe uZuma.
“Ngiyaninxusa malungu e-ANC ePhalamende ukuba nivote ngonembeza,” kusho uMaimane.
Uthe bafuna uRamaphosa avotele ukuthi uZuma akhishwe esikhundleni.
Uthe iNingizimu Afrika isikleliswe namazwe angenzi kahle kwezomnotho ngenxa yobuholi bukaZuma.
Uthe manje yisikhathi sokuthi amalungu e-ANC azibuze ukuthi abeka uZuma phambili noma izwe.
Umhlaziyi wezepolitiki ozimele uSolwazi Somadoda Fikeni uthe leli qhinga le-DA ngeke lisebenze.
“I-ANC iyasiqonda isimo esikhona kodwa akukho engakwenza,” kusho uFikeni.
Uthe uKhongolose ngeke uvume ukuthatha iziyalelo ngaphandle.
“Ukukhishwa kukaZuma kungaphushwa kuphela ngaphakathi kwi-ANC,” kusho uFikeni.