Basola i-SACP ekhuluma iziphikisa
ABAHLAZIYI bezepolitiki sebesole i-SACP ngokuba omalala bephenduka nokungabi nomgogodla ezintweni ezithinta ukwehla esikhundleni kukaMengameli Jacob Zuma.
Laba bahlaziyi bathi sekunzima ukukholwa okushiwo yile nhlangano njengoba ithi ngo-2019, izongenela ukhetho ngokuzimela ingahambisani ne-ANC.
Lokhu kulandela ukuphumela obala kwale nhlangano yathi ngeke ivote namaqembu aphikisayo ukuchitha uZuma ePhalamende kodwa izoqhubeka nezinhlelo zayo ezingaphandle kwePhalamende zokufuna uZuma ehle esikhundleni sokuhola izwe ngoba ayisabethembi ubuholi bakhe.
Umhlaziyi wezepolitiki uMnuz Thabani Khumalo, uthe i-SACP isho lokhu iphinde isho okunye yingakho abantu bezolahlekelwa ukuyethemba.
“I-SACP isifana nabantu abadidekile emqondweni ngoba isho okunye manje iphinde ishintshe isho okunye. Ayazi noma iqhubeke isebenzisane ne-ANC ngo-2019 noma ingaqhubeki ngoba isafuna ukubona ukuthi ubani ozowina engqugqutheleni ye-ANC ngoDisemba,” kusho uKhumalo.
UMnuz Lukhona Mnguni, waseNyuvesi yaKwaZulu-Natal, uthe amaKhomanisi asenkingeni ngoba awafuni ukubonakala njengabantu abadayisa ngezwe ngokuvota namaqembu aphikisayo.
Uthe yingakho le nhlangano ikhuluma iziphikisa ngoba kunamanye amalungu ayo amesekayo uZuma.
“Uma ubheka amalungu e-SACP asePhalamende alikho nelilodwa eliye ngethikithi lale nhlangano kodwa wonke aye ngele-ANC. Uma i-SACP ingabiza wonke amalungu ayo ithi izowaqondisa ubugwegwe yinto okunzima ukuthi yenzeke ngoba awaphenduli kuyona kodwa aphendula kwi-ANC. Odabeni lokungenela ukhetho ngo-2019, kunzima kakhulu ngoba ingakwenza lokhu uma kuwina uDkt Nkosazana Dlamini Zuma ngoba yeseka uRamaphosa (Cyril),” kusho uMnguni.
Uthe kunzima nokusho ukuthi i-SACP inamalungu amangaki ePhalamende ngoba iningi linobulungu obubili, obe-ANC nobe-SACP.
Okhulumela i-SACP, uMnuz Alex Mashilo, ukuchithile ukuthi abazazi ukuthi bafuna ukwenzani wathi basamile ekutheni bafuna uZuma ehlile ekuholeni izwe.
Uthe kunezinhlelo eziqhubekayo zokumchitha wathi ezinye zazo zilele emihlanganweni engabanga khona phakathi kombimbi oluhlanganisa i-ANC, Sanco ne-SACP.
“Kukhona umhlangano owabhuntsha wombimbi ngoJuni. Sisaqhubeka nezinhlelo zokuthi ehle esikhundleni kodwa ngeke sivote namaqembu aphikisayo ngoba afuna ukukhipha i-ANC, nombimbi emandleni. Asisabuthembi ubuholi bukaZuma kuphela, i-ANC kumele iqhubeke iphathe,” kusho uMashilo.
Uthe abathembele evotini lasePhalamende lokususa uZuma ngoba vele banezabo izinhlelo zokuthi ehle esikhundleni.