‘Babhibizwa’ kubuka abagibeli abashayeli
BAFUNA kungenelele izikhulu zamatekisi abagibeli basoThongathi abakhala ngokuthi abashayeli bamatekisi ale ndawo basakazwa ngezimpama phambi kwabo.
Omunye umgibeli ongathandanga ukudalulwa utshele Isolezwe ukuthi kusukela ngoJanuwari walo nyaka abashayeli abakhululekile kahle kwazise abantu abagada umsebenzi erenke yasoThongathi bayabathuka futhi bafuna bashiye imali yelodi erenke.
“Asazi ukuthi sizoyibika kubani le nto eyenzeka erenke yasoThongathi. Sigibela amatekisi asuka oThongathi siya esikhumulweni samabhanoyi, eKing Shaka kodwa kwesinye isikhathi siyabambezeleka uma izikhulu zamatekisi zifuna umshayeli ashiye imali yelodi. Omunye uye agoloze athi imali uzoyishiya kubasi wakhe bese eqhunyiswa ngempama,” kusho umgibeli.
Uthe impama iqhunyiswa phambi kwabo bengabagibeli, nabo bazithole sebengasazi ukuthi benzenjani ngoba umshayeli uphuma erenke esecikekile.
“Abashayeli bangaze badale izingozi ngenxa yesimo esingesihle abasebenza ngaphansi kwaso. Asazi noma wumthetho omusha yini ukuthi abashayeli kufanele bashiye imali yelodi erenke hhayi ukuthi bayihambise kubo kwetekisi njengokujwayelekile? Abakaze basitshele ngezinguquko emsebenzini wabo abanikazi bamatekisi asoThongathi Siyacela iSantaco ibheke lolu daba ngoba asazi sizobikela bani,” kusho omunye umgibeli.
Kuthintwa uSihlalo kasoseshini wasoThongathi ochazwe ngokuthi uSibisi ucele ukuthi kufonelwe umkhulumeli kasoseshini athe nguThusi.
“Angijwayele ukuya erenke mina ngicela uthinte uThusi okhulumela usoseshini kodwa anginayo inamba yakhe,” kusho uSibisi.
USihlalo weSantaco esifundeni iLembe, uMnuz Bongani Mkhwanazi uthe baluzwile udaba lwasoThongathi kodwa basaphenya ukuzwa ukuthi ngabe yinto eyenzekayo yini leyo.
“Okwamanje akukho okubambekayo esikutholayo ngalolu daba. Siyaqhubeka nophenyo ukuthola ukuthi kwenzekani,” kusho uMkhwanazi.