Uhlelo oluzongenisa izigidi eThekwini
LUZONGENISA u-R3 billion uhlelo lokukhangisa iTheku njengedolobha okufanele abatshalizimali bafake inkece yabo kulo oluphasiswe wumkhandlu ngoLwesibili.
Lolu hlelo olubizwa nge-Investment Promotion Strategy and Implementation Plan lwethulwe ngokusemthethweni izolo nguMnuz Phillip Sithole oyiPhini leMenenja kaMasipala weTheku kwezokuThuthukiswa koMnotho.
USithole uthe ukungena kuka-R3 billion kuzodala amathuba omsebenzi angu-3 300 eminyakeni emihlanu ezayo.
“Sifuna iTheku libe yidolobha eliheha abatshalizimali ukuze kudaleke amathuba omsebenzi, kuphele ububha nendlala. Enye yezingqinamba esibhekene nayo ngeyegebe elikhulayo phakathi kwabampofu nabacebile esinethemba lokuthi kuzophela uma sesiheha abatshalizimali,” kusho uSithole.
Uthe ohlelweni lwabo olusha bazosebenzisana nezinhlangano ezibhekelele ezohwebo eMacedonia, Hong Kong, Singapore nakwamanye amazwe.
“Sizoqinisa ubudlelwano bethu namanye amazwe nabatshalizimali bakhona. Sizophinde silethe ubuchwepheshe obusha kosomabhizinisi bethu sithuthukise namakhono abo,” kusho uSithole.
UMnuz Russell Curtis wenhlangano i-Invest Durban uthe bayalweseka uhlelo olusha lokuheha abatshalizimali futhi akangabazi ukuthi luzothela izithelo ezinhle ngoba uMasipala weTheku uzosebenzisana nezinhlangano ezihlukahlukene. “Siyajabula ngoba kuzosebenzisana izinhlaka ezehlukahlukene kusukela kosomabhizinisi, umasipala nezinye izinhlangano ezithinteka kwezomnotho. Lokhu kusho ukuthi sizosheshe sizwakalise imibono yethu uma kukhona imithetho ecindezela osomabhizinisi kanjalo sazise umkhandlu uma kunamathuba okuthuthukisa umnotho alethwa ngabantu esibaziyo.”
IMeya yeTheku uNkk Zandile Gumede ithe baphasise lolu hlelo ngoba bafuna ukuthuthukisa umnotho badale namathuba omsebenzi. “Sizimisele ukudala umnotho ovuleleke kubo bonke abantu baseThekwini, ozoshintsha impilo yabo uphinde udale amathuba omsebenz.”