Imithetho engacacile ivimba utshalomali
UCWANINGO lwakamuva lwenkampani, iGrant Thornton luveza ukuthi u-66% wosomabhizinisi bakuleli awuyitshali imali yawo ngenxa yokungacaci kahle kwemithetho kahulumeni.
IGrant Thornton, yinkampani yabacwaningi mabhuku edumile emhlabeni jikelele.
Lolu cwaningo olwenziwe emazweni angu-36 omhlaba, kwakhulunywa nezikhulu ezingu-9 600 lukhishwe ngoLwesine olwedlule.
UNkk Gillian Saunders, oyiHead Advisory Services kwaGrant Thornton kuleli, utshele izintatheli ukuthi kuningi okwenza osomabhizinisi bahlale nezizumbulu zabo abalule kukho ipolitiki, ukukleliswa kwezwe njengelilengela kwinzikamnotho nokunye.
“Abatshalizimali ngabantu abancikiselayo, ucwaningo lwethu luveza ukuthi abaningi abafuni ukutshala imali yabo kuleli ngoba bekhala ngokuthi imithetho eyengamele amabhizinisi ayiqondile kahle.
“Bakhala nangokushintshwa kwamalungu ephalamende isigubhukane kungalindele muntu,” kusho uNkk Saunders.
Uthe kodwa ukuhlala kosomabhizinisi nezizumbulu yinto ejwayelekile kuwo wonke amazwe ngoba abantu abanemali abayifaki endaweni eyodwa imali yabo.
Uphinde waveza ukuthi u-67% wosomabhizinisi bakuleli, ukhale ngokuthi ukukleliswa kweNingizimu Afrika njengezwe elilengela kwinzikamnotho kubakhinyabezile ngoba imikhiqizo yabo ibingasadayiswa ngenani elilindelekile.
U-51% wosomabhizinisi, ukhale ngezokuphepha abanye bethi sebeke bahlaselwa yizigebengu.
U-64% uzwakalise ukuthi kaweneme ngezinqumo ezithathwa nguhulumeni.
Yize kunosomabhizinisi abakhalayo, uNkk Saunders uthe likhona ithemba ngomnotho waseNingizimu Afrika ngoba u-90% wezikhulu zezinkampani ezinkulu abakhulume nazo, uthe unethemba lokuthi isimo sizoba ngcono.
“U-90% wosomabhizinisi usitshele ukuthi kumnandi ukusebenza eNingizimu Afrika ngoba yizwe elinamabhange asebenza kahle futhi nomthetho uyasebenza.
“Okusho ukuthi akusibona bonke osomabhizinisi ababona iNingizimu Afrika njengendawo abangeke bakwazi ukutshala imali kuyo,” kusho uNkk Saunders.