Kubuyise ithemba ukuqokwa kukaDkt Nonhlanhla Mkhize
MALIBONGWE igama lamakhosikazi! Kule nyanga lesi siqubulo sizoba sematheni njengoba ibhekiswe ekuhlonipheni abesifazane nokuthuthukiswa kwabo.
IKwaZulu-Natal iwuqale ngegiya eliphezulu umkhankaso wokugqamisa iqhaza lembokodo njengoba uNdunankulu Willies Mchunu ngoLwesibili ememezele ukuthi useqoke uDkt Nonhlanhla Mkhize esikhundleni sokuba wuMqondisi Jikelele ehhovisi lakhe.
Selokhu kwabusa uhulumeni wentando yabantu ngo-1994 kuyaqala KwaZulu-Natal ukuthi lesi sikhundla siphathwe ngumuntu wesifazane.
Kusinike umdlandla futhi kwabuyisa nethemba ukuthi izinto zingase zilunge nasezikhungweni zikahulumeni esezidume kabi ngokungawusizi ngendlela umphakathi okushiwo nguDkt Mkhize ngemuva kokumenyezelwa kokuqokwa kwakhe.
UDkt Mkhize uthe azophela amahlathi kubasebenzi bahulumeni abafika emsebenzini sekwedlule isikhathi, abahamba singakashayi isikhathi sokushayisa nabaya ekhefini isikhathi eside kunesibekiwe.
Ubalula lokhu uDkt Mkhize ngoba ethi ufuna ukuqinisekisa ukuthi izidingo nosizo kuyafinyelela kumalungu omphakathi, umuntu angafiki esikhungweni noma ehhovisi likahulumeni angalutholi usizo olufanele ngoba abasebenzi bedojile.
Umbono kaDkt Mkhize sengathi ungaphumelela futhi esekwe ngawo ngoba uma kube njalo kuyobe linqotshiwe ‘idimoni’ elihlasele ezikhungweni zikahulumeni.
Mihla namalanga sithintwa ngabafundi bekhononda ngezikhungo ezinjengamahhovisi ezasekhaya, izibhedlela, amahhovisi ezokuthuthukiswa komphakathi neziteshi zamaphoyisa.
Lezi ngezinye zezikhungo ezisetshenziswa kakhulu ngabantu kodwa abantu ababikelwayo uma kufanele baye kuzona ngoba phezu kokuyojoyina olayini abade, kungenzeka futhi usizo bangalutholi ngendlela, kuphele amahora amabili kuya kwamathathu kumi ibhodi elinombhalo wokuthi umsebenzi usaye ekhefini.
Sengathi uDkt Mkhize angafike awakhuculule amazambane abolile kubasebenzi bahulumeni abahudula izinyawo ekusizeni umphakathi.