Bazohlwaya abadlali kwiNkandla Cup
KULINDELEKE nesinedolo emidlalweni yeNkandla Mayoral Cup ngoMgqibelo eNkandla Stadium njengoba kumenywe amaqembu adlala kwiPSL.
Ngaphandle kwawePSL abantu bazokujabulela ukubona abasakazi boKhozi FM begadulisana namakhansela kaMasipala waseNkandla. Kuzoke kume kancane ukuqagulisana ngezindaba zentuthuko emakhanseleni kanjalo nabasakazi bazoke bame ukumpongoloza emsakazweni kodwa badlise ibhola utshani. Kuyaziwa ukuthi lapho kudlala khona abasakazi boKhozi kuphuma nesinedolo.
Amaqembu ePSL azobe edlala kule midlalo yiJomo Cosmos naMaZulu F.C.
IMeya kaMasipala waseNkandla uThamsanqa Ntuli ithe bameme nabafunela amaqembu ePSL abadlali ukuba bafike bezobheka abadlali abangase babathathe. Uthe kuzobe kukhona abazobhekela iCosmos, Lamontville Golden Arrows, Richards Bay FC, AmaZulu, Mamelodi Sundowns nabamanye.
“Ngale midlalo sihlose ukufukula izinga lezemidllalo endaweni yangakithi. Sifuna abadlali babonwe amaqembu amakhulu ukuze abathathe. Unyaka wesine yenziwa iMayoral Cup, ngibona idlondlobala. Kuzokube kukhona nebhola lezinyawo labesifazane. Kunabashayi sibhakela eNkandla nabo abazoveza ikhono labo. Kulo nyaka sisebenzisana noMnyango wezeMpilo, uzohlola abafuna ukwazi ngezifo zabo. Abadayisa emigwaqweni bazothola ithuba lokudayisa impahla yabo ngalolu suku.”
Uphinde waveza ukuthi kuzoqokwa isikwati sabadlali baseNkandla abangu-22 abazoqhudelana bodwa bebukwa abamele amaqembu ePSL.
“Yilapho-ke izinhloli zizokhetha khona abadlali abazobe besenkundleni. Angingabazi ukuthi bakhona abadlali abazothathwa. Likhona ikhono eNkandla abamaqembu bazobuyela emuva bejabule ngenxa yekhono abazobe belibonile. Kuzoba nabaculi abazonandisa okubalwa kubona iGcokama, TDK, Mamillion, uZakwe nabendawo. Kubekwe imali elinganiselwa ku-R25 000. Ozonqoba esikwatini saseNkandla uzothola u-R15 000 isibili u-R10 000.”