Amazwi enduduzo ngoMasilela
OSAZIWAYO baseNingizimu Afrika badlulise amazwi enduduzo ngokudlula emhlabeni kukaDumi Masilela, bekhalisana kakhulu nenkosikazi yakhe uSimphiwe Ngema.
UDumi noSimphiwe bashade umshado wesintu ekuqaleni kukaJuni.
Umethuli wezinhlelo uBoity Thulo ubhale kuTwitter wathi: “Ngiyazwelana futhi ngidlulisa amazwi enduduzo emndenini kaDumi nakunkosikazi wakhe. Sengathi umphefumulo wakhe ungalala ngoxolo.
UMrepha uBlacklez uthe, “Lala ngoxolo Dumi Masilela. Duduzekani mndeni nezihlobo. Ubugebengu buyinkinga enkulu , omunye umndeni usulahlekelwe indodana”.
URami Chuene oselingisa kuThe Queen kodwa owake wabonakala kuRhythm City uthe: “Uthando lwabantu abancane olunakho konke luzamazisiwe lavivinya. Simphiwe Ngema akukho mazwi kodwa sizwelana nawe. Lala ngokuthula Dumi Masilela”.
Umngani omkhulu kaDumi, uThami Mngqolo, ongumlingisi uthe: “Lala ngokuthula mfowethu. Ngihluleka nokukhuluma. Sengathi singaphinde sihlangane noNkulunkulu akugcine esandleni sakhe.”
Umlingisi uGail Mabalane uthe: “Simphiwe ngizwelana nawe kulesi sikhathi esinzima. Ngisathandaza njengoba kungathi kukhona ozongivusa athi ngiyaphupha iphupho elibi. Siyazwelana nawe ngokulahlekelwa. Ukufa kuyisela. Niqine wena nomndeni wakho.”
Owayengumlingisi weRhythm City, uPam Andrews, uthe uthukile ezwa lezi zindaba. Uthe uDumi ubehlala engumuntu othanda ukukhuthaza abantu.
Abantu bakuleli ezinkundleni zokuxhumana bebesadumele futhi bekhalisa umndeni ngokushona kwalo mlingisi.
UMpumi Phillips ekhuluma esiteshini sakwaeNCA uthe azikho izinhlelo ezikhona kule mpelasonto konke bazokubona ngesonto elizayo.