Kuqokwe abazovala izikhala koweTheku
SEKUQOKWE abazovala izikhala ezivuleke ngemuva kokuhamba nokumiswa kwezikhulu ezithile kuMasipala weTheku.
Izolo iMeya uNkk Zandile Gumede ithe abantu kufanele bathole izidingo nomkhandlu uqhubeke nomsebenzi.
UNkk Gumede uthe ngamanga indaba yokuthi izikhulu ziyawushiya lo masipala noma kunomkhankaso wokukhipha ababethembeke kumholi othile.
Uzwakalise ukukhathazeka ngendlela okubikwa ngayo izindaba zabasebenzi bakaMasipala weTheku wathi abezindaba banehaba uma bekhuluma ngalo mkhandlu.
Uthe izikhulu ezisolwa ngokungaziphathi kahle zizoqondiswa ubugwegwe kulandelwa imithetho eyengamele abasebenzi.
Umemezele ukuthi kusuka ngoAgasti 1, uMnuz Steve Middleton useyisikhulu samaphoyisa kaMasipala weTheku esibambile.
UMnuz Sibonelo Mchunu uzoba yiPhini lakhe elibhekelele ezokusebenza kwamaphoyisa kamasipala, kuthi uNksz Winile Zama abe yiPhini ophikweni lwezokuhlela emaphoyiseni, uNksz Geraldene Steven uwuSenior Superintendent obhekelele ukuqeqeshwa kwamaphoyisa kamasipala.
UMnuz Vusi Mazibuko uyiNhloko yoMnyango wezamaPaki, ukuNgcebeleka namaSiko ebambile.
UMnuz Maxwell Mthembu uyiNhloko esabambile kwagesi kuthi uNksz Zinhle Buthelezi abe yiNhloko esabambile ophikweni lwezeMpilo.
UNkk Gumede uthe uMnuz Phillip Ntsimane usaphethe uphiko lwezokucwaningwa kwamabhuku.
Isikhundla sePhini sobhekelele izimo eziphuthumayo esivuleke ngo-Agasti 1 uthe sizovalwa maduze.
Khonamanjalo, umasipala weTheku uthi kwakufanele amiswe uMnuz Thembinkosi Ngcobo oyiNhloko yiPhiko lwezamaPaki, ezokuNgcebeleka namaSiko. UMasipala uveze lokhu izolo enkantolo yabasebenzi.
UMasipala ucele uJaji Hamilton Cele ukuthi lichithe icala elifakwe nguNgcobo lokuphikisa ukumiswa, akhokhe nezindleko.
UNgcobo uye enkantolo yabasebenzi ekhala ngokuthi umiswe ngokungemthetho ngoba akulandelwanga imigomo ethinta izimenenja.
Uthe akufanele amiswe ngaphandle kokuthi azikhulumele kodwa kwamasipala akanikwanga ithuba lokuthi akhulume.
Ummeli wakhe u-advocate Nalini Govender uthe uNgcobo ubone kungcono aye enkantolo yabasebenzi ngoba iyona ekwazi ukuxazulula izinkinga eziphathelene nomthetho.
U-Advocate Vishalan Naidu uthe uNgcobo akayona imenenja enesikhundla esiphezulu futhi unikeziwe isikhathi sokuziphendulela.
UCele utshele abameli ukuthi kufanele babuye bephethe wonke amaphepha adingekayo wase ehlehlisa leli cala ukuthi libuye ngo-Agasti 22.
UNgcobo uthe wathola umyalelo kwimenenja kamasipala uMnuz Sipho Nzuza ukuthi umcimbi ayewuhlelile uyahoxiswa futhi kwakuwumyalelo ovela kwiMeya nakuNobhala we-ANC, eThekwini.