UNxumalo uqokwe ukuhola ikhomishini yezokuhlela
OBEYIMEYA yeTheku, uMnuz James Nxumalo, uqokwe yiKhabhinethi yaKwaZulu-Natal ukuthi ahole ikhomishini ebhekele ezokuhlela.
Lokhu kumenyezelwe izolo nguNdunankulu wesisifundazwe, uMnuz Willies Mchunu, ngemuva komhlangano obuseMgungundlovu.
Okhulumela uNdunankulu, uMnuz Ndabe Sibiya, uthe ngamava anawo kwezokuphatha, uNxumalo uzohlanganisa imikhakha ehlukene ukuze kube namathuba alinganayo kwezomnotho.
Uthe le khomishini izobuyisa uzinzo lwezomnotho eKZN iphinde iqoke imikhakha engenza kube nokukhula komnotho.
“Enkulumeni eyayibhekiswe esifundazweni, uNdunankulu wamemezela ukuthi uNgqongqoshe wezokuThuthukiswa koMnotho (Mnuz Sihle Zikalala) uzosebenzisana nale khomishini nezinye izinhlaka ukuthuthukisa umnotho. Ikhomishini izolulelwa isikhathi kuze kube wuMashi 31, ngonyaka ozayo,” kusho uSibiya.
UNxumalo uzosebenza noSolwazi Bonke Dumisa nabanye okhomishana.
USibiya uthe ikhabhinethi ibhunge nangamacala ahlobene nezepolitiki nokubheka ukuthi bakhona yini asebeboshiwe ngawo.
“Kusuka nyakenye awu-41 amacala ahlobene nezepolitiki avuliwe. Bawu-62 abantu ababoshiwe ngawo. Amanye awo athinta ukuboshwa kwabasoleka ngokubulala ikhansela laKwaNongoma, uMnuz Thami Nyembe, kwaboshwa ababili; ukubulawa kukaMnuz Xolani Ngcobo eNtshangwe osekuboshwe ababili nakhona namanye athinta ukushiswa komuzi kaNksz Joyce Ngcobo okuthinta ukungaboni ngaso linye phakathi kweSACP ne-ANC,” kusho uSibiya.
Uthe kuthulwe nombiko ngombango wethenda yokudla ezikoleni zesifundazwe njengoba abaphakayo bezophelelwa izinkontileka ngoMashi 2020.
“Ikhabhinethi iyalele uNgqongqoshe wezemfundo (Mnuz Mthandeni Dlungwane) ukuthi aqhubeke nezinhlelo zokuqinisa uhlelo abheke nezikole okusenezinkinga kuzo.”
Uthe kubhungwe nangokuqokwa kwabaholi abazoba semkhandlwini wendlu yabaholi bomdabu esifundazweni.