Kushaqwe amakhompyutha abasolwayo
KUSHAQWE amakhompyutha angu-286 abasebenzi basenyuvesi yaKwaZulu-Natal izolo, abaphenywa ngezinsolo zokudayiswa kwezikhala zokufundela ubudokotela kulesi sikhungo.
Abasebenzi abangu-18 kulaba sebenikwe izincwadi zokuthi bazomiswa emsebenzini, oyedwa kubona usexoshiwe.
Esithangamini sabezindaba ebesiseWestville izolo, umphathi wale nyuvesi, uDkt Albert van Jaarsveld, uthe inhloso yokushaqa la makhompyutha wukuthola ulwazi oluphakathi njengoba kuqhubeka uphenyo.
Uthe bafuna ukuthola ukuthi bangaki abasebenzi abathinteka kulo mkhonyovu. “Kunabafundi abahlanu esizobanika izincwadi zokubamisa. Uma sikhona isidingo sokuthi babekwe amacala bonke bazobekwa amacala okukhwabanisa, bashushiswe.”
Uthe laba abebedayisa izikhala bebesebenza njengeqoqo. “Siphenya izinto eziningi okubalwa nokuthi lezi zikhala zazithengwa ngamalini. Imibiko ekhona nakwabezindaba iveza ukuthi izikhala zazithengwa ngo-R2 500 ezinye kuthiwa nango-R500 000.”
Uthe bebesagodle umbiko wophenyo wenkampani yabacwaningi ngoba bengafuni kuphazamiseke uphenyo.
Abafundi basophikweni iMedical School, bamise ukufunda befuna kudedelwe lo mbiko.
Izolo, amaphoyisa ahlakaze abafundi abebebhikisha ngezinhlamvu zenjoloba.
UVan Jaarsveld uthe bazohlangana nomkhandlu wabafundi namhlanje. “Ngesonto elizayo uSihlalo womkhandlu olawula inyuvesi uzohlangana nabafundi. Sikhathazekile ngesiteleka esiqhubekayo sifisa sengathi abafundi bangaqonda ukuthi uphenyo lusezingeni elibucayi.”
Uthe bafuna ukuqeda inkohlakalo kule nyuvesi ikakhulu njengoba kuzovulwa iwindi lokubhaliswa kwabafundi maduze. “Uphenyo lusaveza ukuthi umkhonyovu wokudayiswa kwezikhala ubuwenzeka kulolu phiko. Nginxusa nabanye ozakwethu bakwezinye izikhungo ukuthi balwenze uphenyo olufuze lolu ukuze kuqedwe inkohlakalo yokudayiswa kwezikhala.”