I-DA ikhala ngenkinga yokubusa ngokubambisana

I-DA isiveze ukuthi ithwele ubunzima ekulawuleni isivumelwano sokubusa ngokubambisana komasipala abakhulu ebaphethe.

Iphinde yaveza ukuthi isiphakamiso sokungabuthembi ubuholi siphinde sabhekiswa komunye wabaholi ababambisene nayo njengoba isimo siya ngokushuba.

Ngakolunye uhlangothi umholi weDA, uMnuz Mmusi Maimane uthi selokhu bethathe ubuholi kulabo masipala abahlanganisa iNelson Mandela Bay, Tshwane neJohannesburgh sebeshintshe izinto eziningi.

UMaimane esithangamini nabezindaba ubehambisana neMeya yaseGoli uMnuz Herman Mashaba, uMnuz Solly Msimanga, iMeya yaseTshwane, uNkk Patricia de Lille oyiMeya yaseKapa no-Mnuz Athol Trollip oyiMeya yaseNelson Mandela Bay, inhloso bekuwukwazisa izintatheli ngebanga asebelihambile selokhu bathatha amandla ombuso kulabo masipala. Lesi sithangami besiseJabavu Library eSoweto izolo.

IDA iveze ukuthi seyiyiqedile inkohlakalo, ubugebengu, nokungaphathwa kahle komasipala futhi yandise amathuba omsebenzi, bakhela nabantu izindlu.

UMaimane uvumile ukuthi kuyinkinga ukubusa ngokubambisana, wathi kodwa kuyiyona ndlela okumele kusetshenzwe ngayo.

Uthe bavumelana nabaphethe nabo ukuthi babeke ukungaboni ngaso linye eceleni basebenzele abantu, ngokuqhakambisa lokho abavumelana ngakho.

“Siyaziqhenya ngokuthi uphelile unyaka sibambisene futhi sisaqhubeka”.

Ukuvezile ukuthi kuke kwaba nzima eNelson Mandela Bay njengoba uTrollip ebengaboni ngasolinye nePhini lakhe uMnuz Mongameli Bobani we-UDM. Uphinde waphawula nangodaba lwaseMogale City lapho i-EFF ebambisene nabo yagcina ivota ne-ANC.