Sithembisa lukhulu isikhulu esisha sakwaTransnet
SIZOQINISA ekuqeqesheni abasebenzi nasezinhlelweni zokunyusa ukukhuthala kwabasebenzi isikhulu sakwaTransnet esiqokwe ngenyanga edlule, esifuna le nkampani ihambe phambili emhlabeni jikelele.
UNksz Nozipho Sithole ongowokuqala wesifazane ukubamba isikhundla sokuba yisikhulu esiphezulu eTransnet Port Terminals, ubekhuluma ngezinhlelo abanazo kule nkampani ngesikhathi kuhlangene amakhasimende abo nabezindaba, eThekwini.
UNksz Sithole uthe uzothuthukisa izinhlelo ezivele zikhona kule nkampani ukunyusa izinga lokukhuthala kwabasebenzi. Ulinganise ngohlelo lwangaphakathi lapho abasebenzi abenza kahle, benikwa ithuba lokufundisa abanye nokubadlulisela ulwazi lwabo. Uphinde wakhuluma ngohlelo lokunikeza intsha imifundaze, oluyivulela namathuba omsebenzi.
UNksz Sithole uthe bafuna ukwehlisa ukubambezeleka kokuthululwa kwamabhokisi empahla emikhunjini nokungena kwamaloli kumatheminali. Uphinde wakhuluma nangezikhalo ngomgwaqo uBayhead oba nesiminyanyama ngenxa yamaloli asuke elethe impahla nazoyilayisha. Uthe sesehlile isiminyaminya kulo mgaqo kodwa basaqhubeka nokuzama ezinye izindlela zokusinciphisa, iloli ihlale okungenani imizuzu engu-43 kwitheminali.
UNksz Shulani Qalinge oyisikhulu esiphezulu eNational Ports Authority, uthe okunye okuseqhulwini wukusheshisa izinhlelo zokungenisa imikhumbi emikhulu emachwebeni akuleli. Uveze ukuthi abakwaMSC Cruises abangamanye bamakhasimende abo, bafuna ukuletha imikhumbi emikhulu eThekwini naseCape Town.
UMnuz Ravi Nair oyisikhulu esiphezulu kwaTransnet Freight and Rail uthe bazimisele ukwakha eminye imigwaqo exhumene nemizila yezitimela, ukunciphisa isiminyaminya. Uveze nokuthi sebandise nesibalo sezitimela ukugwema izinkinga zokushoda kwazo, obekubaxabanisa nabagibeli.
Uthe baqinise nezokuphepha ezitimeleni nalapho kulayishwa khona izimpahla ukuze amakhasimende aneliseke. Uphawule nangodaba lokwanda kwemigulukudu esiphendule isizinda sezidakamizwa ojantshi namabhuloho abo. Uthe ezinye zalezi zindawo ngezakwaMetrorail kanti basebenzisana nabo ukuqeda lo mkhuba.