Usegxile ekwenzeni ukudla okunempilo
UFUNA iphele imicabango yokuthi ukudla okunempilo akumnandi, owesifazane osezakhele udumo ngokupheka.
UNksz Lungi Nhlanhla (27) onebhizinisi iLungi’s Corner, wayengazi ukuthi uyogcina engumpheki onohlonze ngoba wafundela iFashion and Textiles, eDurban University of Technology. Yize ayevele ekuthanda ukupheka, ukungenela umncintiswano wakho kwamvulela amathuba.
“Ngasebenza unyaka emkhakheni wemfashini, ngo2011 ngangenela umncintiswano iMasterChef SA Season 1. Yiwona owangivulela amathuba ngoba ngangimncane kunabo bonke ababengenele.”
Ngo-2012 waqashwa yiDrum Magazine ukuba ngumhleli wezokudla, ecobelela ngezindlela zokupheka. Ngenxa yokufuna ukukhula, waqala ibhizinisi wasebenza namanye amaphephabhuku nezinkampani zokupheka. Ngo-2014 waqokelwa ukuba yinxusa le-Olive Brands okuyikona okumenze waduma. Kulo nyaka uqale ukufundela iFood Nutrition nge-Internet.
“Ngifuna ukugxila ekudleni okunempilo. Ngithole ukuthi abantu bayakuthanda ukudla okunempilo kodwa badikibaliswa wukuthi akunambitheki kahle. Yingakho sengenza lezi zifundo ukuze ngikhombise abantu ukuthi ungadla noma yini oyithandayo kodwa enempilo, kuya ngendlela ukudla okuphekwe ngayo,” kusho uLungi.
Uthe useqalile ukuhlanganisa izidlo ezinempilo, azoziyisa emakhasimendeni. Uthi uqale ngeMuesli azenzela yona ngoba abantu bebekhononda ngokuthi iqinile futhi ayinambitheki kahle. Uzokwenza nezinye izidlo afisa nokuthi zitholakale esitolo. Ebuzwa ngekhono lakhe kwezemfashini uvele wahleka.
“Ngisengabuyela nakhona kodwa okwamanje ngisafuna ukugxila ekudleni,” kusho uLungi.
UNksz Nhlanhla useke waba yiGeneral Manager eClassique Braai Lounge, eHillcrest. Ngonyaka odlule ubeyingxenye yabapheki abebekwi-Essence Festival ebihlelwe uMasipala weTheku. Ubekhona kwiHouse and Garden Show nakwiDecorex nonyaka. Uyamenywa ukuyofundisa ngokudla okunempilo nezindlela zokupheka. Useke waba yijaji kwiCheckers Championship Boerewors nakwiShisanyama Awards.