Othisha badube ukufundisa
KUPHAZAMISEKE ukufunda eThembimfundo Special School, eShowe, emuva kokuthi othisha nabanye abasebenzi beqhinqe emahhovisi omhloli bekhala ngokungaholi izinyanga eziyisithupha.
Isolezwe lithole ukuthi kusukela ngoMsombuluko abafundi bebengangeni emakilasini kanti izolo kubizwe abazali ukuthi bazothatha labo abahlala esikoleni ngenxa yokuthi othisha nabanye abasebenzi baseThembimfundo bebeqhinqe ngaphandle.
Omunye umzali ocele ukungadalulwa igama ngoba esaba ukuthi ingane yakhe izohlukunyezwa uthe sekunesikhathi uthishomkhulu esolwa ngokudla imali kodwa kuyaqala ukuthi kube nesiteleka nezingane zigcine seziphazamiseka.
“Othisha basitshele ukuthi bayile ehhovisi lomhloli kodwa amaholo awangenanga yingakho bekhethe ukuyoqhinqa khona. Iyasikhathaza le ndaba ngoba asinaso esinye isikole esibhekelela izingane ezikhubazekile eShowe, iThembimfundo evulwe ngo2014 iyona yodwa esilekelelayo thina esingakwazi ukuhambisa izingane emadolobheni,” kusho umzali.
Uthe bashiye uthishomkhulu nabahloli bezoba nomhlangano izolo kanti bafuna ungqongqoshe angenelele ukuze izingane zibuyele esikoleni.
UMnuz Kwazi Mthethwa okhulumela uNgqongqoshe wezeMfundo KwaZuluNatal uthe othisha akumele bashiye izingane uma benezinkinga.
“Abafundi yibona abalahlekelwa yisikhathi sokufunda uma kunjena. Siyacela othisha basibikele uma benezinkinga bangazithatheli izinqumo zokushiya izingane zodwa. Ungqongqoshe uzolusukumela udaba lwaseThembimfundo ukuze abafundi bangasali ezifundweni zabo,” kusho uMthethwa.