Sibonga i-Icasa egcine isukumele eyokubiza kwe-data
EKUGCINENI kubonakala sengathi sesizwakele isikhalo sabathengi ngamanani e-data njengoba inhlangano elawula ezokuxhumana eNingizimu Afrika, i-Icasa, isithe izophenya.
Uma kukhona umkhankaso okufanele wesekwe futhi ubeleselwe ngayo yonke indlela owokugqugquzela ukuthi kwehle amanani e-data. Siyabonga ukuthi nabantu abalawula le mboni sebeyavumelana ngokuthi kukhona okushaya amanzi ngamanani abathi abiza kakhulu ngisho uqhathanisa namazwe awomakhelwane.
Kuzokwenza umehluko ekulweni namanani ukuthi i-Icasa ilibeke ngembaba elokuthi i-data iyabiza futhi kufanele yehliswe.
Akuzukubhekwa nje amanani kodwa kuzophenywa nokuthi yini eyenza kubuye kuthiwe i-data isiphelelwe yisikhathi ekubeni ingakapheli futhi ube uyikhokhele. Ngokwenza i-data iphelelwe yisikhathi izinkampani zezokuxhumana ziyasiphoqa ukuthi siyithenge futhi ngoba yonke into yobuchwepheshe incike kuyona.
Abantu abasayisebenzisi i-airtime kakhulu ngakho inzuzo enkulu lezi zinkampani seziyenza nge-data. Kade sasikhala ngamanani e-data futhi kungaqondakali nokuthi yini eyenza ibize ekubeni kwamanye amazwe ingabizi futhi kunezindawo eziningi ngisho izinto zokuthutha umphakathi imbala lapho uthola ukuthi kune-Wifi yamahhala.
Njengoba yonke into isincike kwezobuchwepheshe, ukubiza kwe-data kunomthelela ekungakhulini komnotho, ekungakhiweni kwemisebenzi kanjalo nakuhlobo lwemfundo etholwa izingane eziqhamuka emakhaya antulayo.
Ukubiza kwe-data kunqinda amandla ezinkampani, ikakhulukazi ezincane, okutshala imali nengqalasizinda kwezobuchwepheshe besimanjemanje nokwenza zingakhuli ngendlela efanele.
Abantu abaningi abahlwempu abakwazi ukuthola ulwazi olutholakalangobuchwepheshe ngenxa yokubiza kwe-data. Nakuba sibonga ukuthi i-Icasa igcine isukumile kodwa amehlo ayo avuleke emva kwendaba ngoba kade sasixhashazwa ngamanani e-data. Asithembe ukuthi uphenyo lwayo luzoshesha kushintshwe nomthetho masinyane.