Uboshiwe ‘owabulala’ iphoyisa
UPHELELWE amahlathi okucasha osolwa ngokubulala iphoyisa elaphucwa isibhamu eMthwalume njengoba amaphoyisa embophile ngemuva kwezinyanga eziyisisikhombisa iphoyisa labulawa.
Umsolwa obhekene necala lokubulala uConstable Siyabonga Mbhele (28), owayesebenza esiteshini saseMsinsini, uboshwe ngoLwesithathu.
UMbhele wabulawa ngoNovemba nyakenye ehleli nozakwabo owalimala kulesi sigameko abaphucwa kuso izibhamu zomsebenzi.
Kuthiwa abaphenyi baseScottburgh nabase-Hibberdene bathole ulwazi lokuthi umsolwa usuka ePort Shepstone uya ngaseThekwini uhamba ngo-N2, ngoLwesithathu.
Lolu lwazi luthunyelwe amanye amaphoyisa okubalwa awophiko lwezinja aseMlaza nawaseMzinto K9 nawe-Crime Prevention eScottburgh.
Umsolwa ubehamba ngemoto enezinombolo zaseGoli okuthiwa ibihamba ngesivinini esiphezulu.
Okhulumela amaphoyisa KwaZulu-Natal, u-Lt Colonel Thulani Zwane, uthe umsolwa ulandelwe ngemuva ngamanye amaphoyisa, amanye amvimba ngaphambili.
Amaphoyisa amise imoto ngaphandle kwezinkinga, umsolwa zamkhalela nabangani bakhe abathathu abebesemotweni.
“Umsolwa oneminyaka engu-23 uzobhekana necala lokubulala, elokuzama ukubulala nelokubamba inkunzi nelokuduna izimoto. Uzovela enkantolo maduze,” kusho uZwane.
Umsolwa uzojoyina abasolwa abahlanu ababoshelwe icala elifanayo, icala labo eselivele liqulwa njengoba lizobuyela ngoSepthemba 1 enkantolo.
Ngesikhathi kubhekwa imoto kamsolwa kutholwe izikhwama ezimbili ebhuthini, izibhamu ezimbili ezingekho emthethweni okuyi-9mm ebinezinhlamvu ezingu-15. Kutholwe nezigqoko ezintathu zokumboza ubuso. Imoto abebehamba ngayo kuvele ukuthi ibiqashiwe. Imoto ithathwe amaphoyisa.
Ibamba lomkhuzi wamaphoyisa, u-Major General Bheki Langa, lincome umsebenzi wamaphoyisa lathi abasolwa ababoshwe nalona osolwa ngokubulala iphoyisa kumele kubhekisiswe ukuthi abathinteki yini kwamanye amacala, kuhlolwe nezibhamu ezitholwe kubona ukuthi azikaze yini zisetshenziswe kwamanye amacala.
Kwenzeka lokhu nje amaphoyisa asathungatha abasolwa ngokubulala uConstable Nobukhosi Msimang obesebenza esiteshini sase-Alexandra Road, eMgungundlovu. Leli phoyisa libulawe emzini walo nomyeni walo uMnuz Thabo Msimang.