Kuboshwe indoda ebidayisa izincwadi zekhansela
IBOSHIWE indoda ebanjwe idayisa izincwadi zekhansela eziqinisekisa ikheli eziwumgunyathi esiteshini sokuhlolelwa ukushayela iRossburgh, eThekwini, ngoLwesithathu.
Okhulumela uMasipala weTheku, uNksz Tozi Mthethwa, uthe amaphoyisa kamasipala anikele eRossburgh ngemuva kokuthola umbiko wokuthi kunowesilisa odayisa izincwadi zamakhansela okuvumeleke ukuthi kube yiwo kuphela azikhiphela umphakathi.
“Ngemuva kokutholakala kombiko, kujutshwe ithimba lamaphoyisa kaMasipala weTheku ukuthi liye eRossburgh. Afike khona abopha indoda. Udaba ludluliselwe emaphoyiseni akwa-SAPS, okuyiwo azophenya ngalezi zinsolo,” kusho uNksz Mthethwa.
Kuthiwa izincwadi bezidayiselwa abantu abebezocela izincwadi zokufundela ukushayela. Zidayiswa ngo- R50. Abantu bebezithola sezisayiniwe endaweni lapho kusayina khona amakhansela.
Ithimba lezintatheli zeSolezwe lizamile ukuzithenga izincwadi kodwa abantu abebekhona baphika bama ngentaba ukuthi ziyadayiswa. Kube sekuvela ukuthi lifike ngemuva kokuboshwa kwendoda.
Okhulumela amaphoyisa KwaZuluNatal, U-Lt Colonel Thulani Zwane uthe kuvulwe icala lokukhwabanisa esiteshini samaphoyisa eBellair.
“Indoda ibhekene necala lokukhwabanisa. Kulindeleke ukuthi ivele eNkantolo yeMantshi yaseThekwini maduze,” kusho uZwane.
NgoLwesibili iRossburgh ihanjelwe nguNgqongqoshe wezoThutha, ukuPhepha nokuXhumana koMphakathi KwaZulu-Natal, uMnuz Mxolisi Kaunda, ukuzokuzwa izikhalo zabantu ngendlela okusetshenzwa ngayo. UKaunda ukuqinisekisile ukuthi umnyango wakhe uzokwenza konke okusemandleni ukulwa nenkohlakalo.