Akukho engizisola ngakho - Xulu
AKAZISOLI ngesikhathi asihlale kwiKaizer Chiefs umdlali wasemuva, uSiyanda “Magazi” Xulu, omenyezelwe njengomunye wabadlali abasha beMaritzburg United izolo.
UXulu ubuye phesheya kumasizini amathathu edlule, wajoyina iChiefs ngethemba lokuwina izindebe naleli qembu. Emuva kokuphendulwa isibukeli ngumqeqeshi uSteve Komphela ugcine ecele ukukhululwa enkontilekeni yakhe. Ngesizini edlule udlale imidlalo eyisithupha kuphela kuMakhosi. Ubephinde adlaliswe emidlalweni yeMultichoice Diski Challenge (MDC). UXulu usayine inkontileka yeminyaka emithathu neTeam of Choice.
“Akukho engizisola ngakho. Bekuyinto engajwayelekile kimina ukungadlali. Kodwa ngibona ukuthi isitayela sami sokudlala besihlukile kunalokhu obekudingwa ngumqeqeshi. Ngeke ngizigxeke ngokukhetha iChiefs, mhlawumbe bengiseqenjini elifanele kodwa ngesikhathi okungesona,” kusho uXulu.
“Amasizini amabili abenzima kakhulu futhi bekuyinto entsha ukuzitshwa (ngumqeqeshi). Angifuni ukugxila kakhulu kukhona kodwa ngiphoxeke kakhulu. Kuningi obekulindelekile kimina. Kodwa ngeke ngikubalekele ukuthi bengingesikhona lokhu umqeqeshi abekudinga, yikho ngiqoke ukuhamba.”
Emasontweni edlule kuvele ukuthi bekunezingqinamba ekukhokhelaneni kweChiefs noXulu owasayina inkontileka yeminyaka eyisihlanu ngesikhathi efika kuleli qembu emuva kokushiya iRostov yaseRussia ngo-2015. UXulu wayekade ehambe eNingizimu Afrika ngo-2012 edlalela iMamelodi Sundowns.
Izolo wethulwe kwiTeam of Choice esithangamini nabezindaba nabanye abadlali abayisithupha okungunozinti waseGhana uRichard Ofori nobevimba kwiBidvest Wits uJethren Barr. Abanye nguMxolisi Kunene waseNewcastle obedlalela iBaroka, uMotsie Matima obekwiSundowns, Rushine De Reuck obekwi-ASD Cape Town noLiam Youlley obedlala e-Australia.
“Benginawo amanye amaqembu abengifuna kodwa inhlosonqangi bekuwukudlala, ukuya lapho ngizokwazi ukubuya khona njengomdlali. Ngicabange ukuthi iMaritzburg yilona iqembu elingifanele. Okwamanje bengidinga iqembu elizokholelwa kimina. IMaritzburg yilona iqembu elibeke okuphelele okukhona ukuthi umqeqeshi yikuphi akudingayo kimina. Sikhulumile nomqeqeshi (Fadlu Davids) ezinsukwini ezimbili ezedlule, wangichazela ukuthi ufuna ngihole abanye abadlali,” kusho uXulu. “Angifuni ukuzifaka ingcindezi, yikho ngiqoke ukuza lapha. Isifiso sami sokuqala ukulwela indawo yami. Ukufisa izinto ezinkulu ngeke kungisize yikho ngifuna ukwenza okulula okuwukusiza iqembu. Angicabangi ukuthi neMaritzburg ingazifaka ingcindezi ngokuthi ifuna ukuqeda kuphi ku-log kodwa inamaphupho njengeqembu lokuqeda kwi-Top 5.”