Abalandeli abafunde ezigamekweni zasezinkundleni
NGEMUVA kwezigameko eziningi esezenzeka zokufa kwabantu ngokunyathelana ezinkundleni zebhola eNingizimu Afrika ubungacabanga ukuthi akuselula ukuthi ziphinde zenzeke lezi zehlo. Iziga zalolu hlobo azisizi ukukhangisa nokukhulisa umdlalo webhola lakuleli.
Okwenzeke eFNB Stadium ngoMgqibelo bekungamele kwenzeke. Umbuzo uthi ngubani okumele aphonswe imibuzo noma abekwe icala ngalokhu? Iminwe ikhomba kwinhlangano elawula ibhola elilkhokhelayo kuleli iPremier Soccer League (PSL) nezokuphepha zayo, abalandeli nalabo abenza umkhonyovu wokudayisa amathikithi angombombayi.
I-PSL ifanele ukuhlela kangcono izinto zayo ikakhulukazi uma kukhulunywa ngomdlalo weKaizer Chiefs ne-Orlando Pirates okuyiwo vele onomlando odlula eminye wokuphuma kwezidumbu zabalandeli benyathelana uma zingahleliwe kahle izinto.
Okokuqala nje obungakulindela wukuthi iqheliswe eduze kwenkundla indawo okubhekwa kuyo amathikithi abantu abangena enkundleni ukuze kube nesikhala esanele sokubhekana nalabo abeza bephethe amathikithi angombombayi.
Okunye kuthinta bona abalandeli bebhola abathi sebezwe kahle ukuthi amathikithi omdlalo aphelile kodwa baphikelele ngenkani nokuthenga amathikithi abawazi kahle kamhlophe ukuthi angombombayi. Lo mkhuba uma ungapheli kubalandeli kulukhuni ukuthi ungathi izigameko ezifana nalesi sangesonto eledlule ngeke siphinde sizibone.
Abalandeli kuyadingeka bakwamukele ukuthi uma esephelile amathikithi into engcono abangayenza wukuthi umdlalo bawubuke kuthelevishini noma bawulalele emsakazweni ngoba kusuke kunguwe mlandeli osindwe zinyawo wangalithenga ithikithi ngesikhathi. Ukuza komlandeli ongenalo ithikithi eliqondile esandleni akuyona ingozi kuphela kulowo osuke eliphethe kodwa kuyingozi ngokulinganayo nakuloyo osuke ekhiphe imali yakhe yokugcina walithenga ngesikhathi eliqondileyo. Kwazi bani nje ukuthi laba balandeli ababili ababe neshwa lokudlula emhlabeni bebephethe anjani amathikithi?
Impucuzeko kuyo iPSL nakubo abalandeli bebhola yinto okunesikhathi eside ishunyayelwa. Okubi nje ukuthi ayibonwa nangokhalo. Le mpucuzeko yahlula ngisho elakuleli selisingathe iNdebe yoMhlaba yebhola ka-2010 la khona abalandeli bakuleli bafunda ukuthi isihlalo ohlala kuso yileso esisuke sibhalwe ethikithini lakho. Ngemuva kokuphela kwalo mqhudelwano iPSL yakuthatha yakulahla kude le konke lokho kwabuya lobu buhlathi obuqhubekayo njengamanje. Nabo abalandeli abakaze bayilwele le mpucuzeko yize kweminye imidlalo emikhulu elandelwa kakhulu kuleli, ibhola lombhoxo nekhilikithi beyisebenzisa le ndlela yokuhlala ngaphandle kwezinkinga.
Abanye abawuphoyizini omkhulu kulokhu kufa kwabalandeli ezinkundleni zebhola yilabo abadayisa amathikithi angombombayi. Kulokhu ke iPSL kudingeka isebenzisane nabembokodo ebomvu ukubopha lezi zigila mkhuba. Kuyadingeka sibabone beboshwa futhi begwetshwa laba abenza lo mkhuba ngoba yibo futhi okumele babekwe amacala okubulala abalandeli. Yibo kanye namathikithi abo angekho emthethweni abadala izigameko zokufa kwabalandeli. Okunye okungezwakali kwabanye abalandeli yindaba yokufika ngesikhathi enkundleni. Ukufika kusasele amahora amabili kuqale umdlalo kwenza omkhulu umehluko empilweni yomlandeli webhola lakuleli ngoba ziningi izinto ezingahlelekile emasangweni alezi zinkundla.
Uma ufika kusenesikhathi usuke uzinika elihle ithuba lokuphepha ngoba uyakwazi nokuzibona uma ungena endaweni engakufanele. Masizijwayeze lokho ngoba asikwazi ngempela okungasehlela nxa sifika isikhathi sesidliwe yinja. Sesiyohlalela ethembeni ke lokuthi labo abaqashwe yiPSL baphenye ngesigameko sangesonto eledlule bazosethulela umbiko ophelele ngokwenzekile. Ithemba ke kodwa anginalo mina ngoba ngoba ziningi izigameko ezithinta ukuziphatha kwabalandeli ezinkundleni zebhola ezenzekile nangesizini edlule kodwa esingakezwa lutho ngazo namanje. Manje uma ngingathi nginethemba elikhulu ngalesi sakamuva ngabe ngiyazikhohlisa.
]Angiphethe lesi sahluko sami sanamuhla ngokuthinta kancane indaba esegudwini nxa kukhulunywa ngebhola lakuleli njengamanje. Leyo ndaba yileyo ethinta isihlalo okungahlaleki kuso somqeqeshi we-Orlando Pirates.
Umbuzo wami uthi bazohlehla baze babe bangaki kanti laba baqeqeshi baleli qembu ngaphambi kokuba zilunge izinto. Mhlawumbe lolu daba seludinga uphenyo loMvikeli woMphakathi: sidinga ukuthi ake asiphenyele kahle ukuthi kanti kwakhala nyonini kuleli qembu.
UKjell Jonevret lo usulile ngoLwesibili kungakapheli nezinyanga eziyisithupha ethathe kuMuhsin Ertugral ubevele engenagazi kubalandeli baleli qembu abacikwe ukungangeni ngisho kwi-Top 8 kweqembu labo ngesizini edlule.
Ukuvula ngesibhaxu kowobungani neChiefs ngeledlule nakho kufane nokuhlikihla usawoti esilondeni ebesivele sibhibha. Umbuzoke kodwa engingawazi ukuthi uyophendulwa ngubani ngowokuthi ngonjani kanti umqeqeshi oyolunga kuleli qembu? Make sithi nje siyoyicela ivuthiwe eyalesi sihlalo esivutha amalangabi somqeqeshi weBucs.