I-Toyota C-HR eyabathanda isitayela
INDLELA kwaToyota abayichaza ngayo iC-HR bathi bayakhele abantu abanganqeni ukuzama izinto ezintsha kanjalo nemikhiqizo emisha.
Bathi ngeyabantu abathanda isitayela neqophelo eliphezulu lemoto abayithengayo.
Kukhona uDJ waseThekwini ozakhele udumo ngokudlalela iBig NUZ, uDJ Boonu. Naye uhamba ngayo le moto. Uhlale ezishaya isifuba ngokuthi uwumuntu wokuqala eThekwini ukuhamba ngayo, nokuyinto obungekho ubufakazi bayo. Uyambona nje ukuthi imoto yakhe iyigugu kuye ngokuhluka kwayo. Lokhu kukhombisa ngokusobala ukuthi kwaToyota bayawaqonda amakhasimende abo ngoba nangu uBoonu uzibona ehlukile kwabanye futhi angingabazi ukuthi izokwenza kahle emakethe.
Le crossover noma iSUV encane, ihluke kakhulu kunezimoto iToyota eyake yazakha phambilini uma uyibuka.
Inhle indlela ebukeka ngayo futhi ngithanda nemibala yayo egqamile. Ebengihamba ngayo ishaya ngombala oluhlaza okwesibhakabhaka owadonsayo amehlo.
Izishaya sa-coupe ngenxa yokuthi izibambo zokuvula izicabha ngemuva azikho lapho kuhlala khona ezemoto ejwayelekile kodwa zona ziphezulu.
Lokhu nokho ngikubone kuphazamisa uma ushayela ngoba iwindi langemuva lincane. Kwenza kube nzima ukuqalaza izimoto ezisemaceleni ngaphambi kokuthi udlule enye imoto.
Inyathela ngamasondo anamarimu angu-17 inch.
Uma ungena ngaphakathi uyezwa ukuthi ungena emotweni ephakeme kodwa uma usushayela ilula.
Ngaphakathi ayinalo uxhaxha lwamabhathi kwi centre console futhi inetouchscreen esiveza umsakazo nokunye. Ukwazi ukuxhuma i-USB, iPod, iPhone, Bluetooth, CD/DVD. Inamabhathini okulawula izinto esiteringini futhi ine-cruise control.
Sengathi bengagixa isunroof ukwengeza ubuhle.
Izihlalo zakhona zangaphambili ngathi ugonothile uma uhleli kuzo futhi zintofontofo.
Abagibeli bahlala ngokukhululeka kodwa inkinga isebhuthini ngoba incane kwazise nokhakhayi lwayo luyisibaca ngemuva.
Ngaphansi kwebhonethi iC-HR iphuma nenjini engu1.2 litre turbo engine. Ikwazi ukukhiqiza amandla angu-85 kW netorque ka-185 Nm. Ukusuka ku-0 iye ku-100km/h kuyithatha imuzuzwana engu-10.9 kanti ijubane layo elikhulu ngu190km/h.
Ngebanga lika-100 km bathi kuyithatha iphuza amalitha angu-6.3 kweshintshwayo, nokuyiyo ebengihamba ngayo. Idonsa ngamagiya ayisithupha ashintshwayo aneToyota intelligent Manual Transmission esiza ukuthi ibambe ama-revvs uma ushintsha igiya nokwenza ingazwakali ukuthi sekungene elinye. Enye iyiCVT (Continuous Variable Transmission).
Lo mncanyana wenjini uyakwazi ukuyithwala futhi ingene ejubaneni ngaphandle kwenkinga. Ukuze ihambe ntofontofo bayigaxe ususpension weMacPherson.
Ngakwezokuphepha ifika nambhreki e-ABS, Brake Assist, EBD, Hill Assist Control neVehicle Stability Control. Inama-airbag omshayeli nomgibeli.
Kungiphoxile nokho ukuthi ayinawo ama-sensor asiza uma upaka.
Nokho ngicabanga ukuthi uToyota wakhe imoto esezingeni futhi ongathembela kuyo. Izimbangi impela kuzomele zibhukule ukuze zingalahlekelwa ngabathengi. Ngenyanga eyedlule nje, kudayiswe amaC-HR angu-161 kanti ngoJuni ayengu-167. INANI
Kunezinhlobo ezintathu ongakhetha kuzo kuye ngezinto ephuma nazo nangegiya.
Toyota C-HR 1.2T 6MT – R 318 500
Toyota C-HR 1.2T 6MT Plus – R 345 000
Toyota C-HR 1.2T CVT Plus – R 356 000
Zonke izinhlobo ziphuma neservice plan yeminyaka emihlanu noma u-90 000km ne-warranty yeminyaka emithathu noma ibanga lika-100 000km.