I-Audi Q2 ayikakandi kakhulu
YIZE itheleke emakethe ngoFebhuwari kodwa kusekhona abayexwayayo i-Audi Q2 emgwaqweni. Ngeke uthuke nokho ngoba ayikakandi kakhulu. Bheka ngoba ngenyanga eyedlule kudayiswe angu-35. Lokhu ungakubheka ngezindlela eziningi. Ungathi yingoba yakhelwe abantu abantu bekhethelo noma abanye banqeniswa yinani layo ngoba akusiyo imoto engathengwa yinoma wubani. Kodwa omunye ohamba ngayo eThekwini weneme ngeQ2 yakhe ngenxa yokuhluka kwayo. Akanankinga futhi nangenani ngoba eyakhe ethi ibiza ngaphezulu kukaR600 000. Lokhu kungenxa yezinto azifakile ozikhokhela imali ukuze ube nazo.
Ebengihamba ngayo nje i-1.4T FSI Sport S tronic ibiza uR529 500. Kodwa ngenxa yezinto efakwe zona igcine isibiza uR568 960. Zihlanganisa i panaromic sunroof (R15 000), amarimu angu-18” 5-arm dynamic design, contrast grey (R12 000), parking system plus with selective display (R10 160) neBrushed aluminium inlays (R2 300).
Naphezu kwalokhu nokho lo magcino wezimoto ezingamaQ kwa-Audi, uyimoto esezingeni eliphezulu.
Ngaphambili ishaya nge singleframe grille ehleli ngaphezu kwama air inlets amakhulu futhi eyenza ukuthi le moto igqame uma iqhamuka. Emaceleni ishaya ngama criss kanti ukhakhayi luyehla luyoba yisibaca ngemuva.
Iphakeme ngo-1.51 metres, ivuleke ngo1.79 metres kuthi ubude bayo bube ngu-4.19 metres.
Ngaphakathi ilayisha abagibeli abahlanu kanjalo nempahla efinyelela ku-1.050 litres uma kulaliswe izihlalo zangemuva. Ibhuthi lingudedangendlale kwazise nesipele yileli sondo elincane abalibiza ngebhiskidi elokishini.
Okufike kugqame uma ungena ngaphakathi yi-Audi Virtual Cockpit engu12.3 inch.
Ngaphandle nje kokuveza ijubane le moto, uphethroli nokunye, umshayeli uciphaza ibhathini esiteringini bese iveza inkombandlela noma ikuvezela ingoma edlalayo noma umsakazo nokunye.
I-centre console yayo ingichaza ngokungabi nawo amabhathini amaningi. Kukhona ama-MMi Navigation system amabili ongakhetha kuwo. Enye ukwazi ukwenza imoto i-Wi-Fi uxhume neselula ngeApple CarPlay noma i-Android Auto.
Uma uthanda ungakwazi ukuzikhethela ukuthi ufuna ibukeke kanjani ngaphandle nangaphakathi nokuyinto eyenziwe wudadewethu engikhulume ngaye ngenhla.
Kukhona izinjini ezimbili zikaphethroli nekadizili eyodwa. Ekaphethroli encane ingu-1.0 TFSI ekhiqiza amandla angu-85kw netorque ka-200Nm. Kukhona engumanual neyiS tronic. Kukhona ne-1.4 TFSI enamandla angu-110kw netorque ka-250Nm. Nakuyo kukhona enamagiya ayisithupha ashintshwayo noma eyiS tronic okuyiyo engithole ithuba lokuyishayela. Ngebanga lika-100km bathi isebenzisa amalitha angu-5.2 Amanani: • Audi Q2 1.4T FSI Sport S tronic: R529,500 Iphuma ne-Audi Freeway Plan yeminyaka emihlanu noma ibanga lika-100 000km.