Ifike isinenjini kadizili iKia Soul

ABABELANDELA umbukiso wezimoto iParis Motos Show ngasekupheleni konyaka odlule bayibona iKia Soul entsha.

Ezinyangeni ezimbili ezedlule ithelekile eNingizimu Afrika futhi ifike isinenjini entsha Madikizela.

Isizukulwane sesibili sale moto satheleka kuleli ngo-2014.

UMqondisi wezokuKhangisa kwaKia Motors South Africa, uDavid Sieff, uthe emekathe lapho kunenqwaba khona yamacrossover namaSUV amancane, iSoul ikwazile ukuqhamuka nento ehlukile futhi igqame.

Injini entsha itholakala kwiSoul 1.6 CRDI START. Le njini ifuqa amandla angu-94 kW netorque ka-260 Nm.

Bayigaxe ugeabox onamagiya ayisithupha ashintshwayo. Kwabafuna umshini ozishintshayo kumele bakhohlwe ngoba awukho.

Le njini inamandla ngoba emqanseni asikho isidingo sokulokhu ushintsha amagiya kodwa iyishaya ngalelo osuke uhamba ngalo.

ISoul START iphuma nezinto eziningi ezihlanganisa umsakazo okhandelwe kuyo odlala iMP3/ Aux/USB, Bluetooth, inezipikha eziyisithupha, central locking, ikhamera ekuvezela ingemuva uma uhlehla, amawindi kagesi, isiteringi esinekhava yesikhumba futhi sinamabhathini okulawula umsakazo nokunye.

Iphinde ibe namabhreki e-ABS nama-airbags ayisithupha.

Ngaphandle kwalokhu kwaKia baphinde bathuthukisa indlela ebukeka ngayo iSoul njengothinta ubhampa ngaphambili, i-grille kanjalo namalambu.

Nangemuva bashintshe kancane ubhampa, amafog lights amasha.

Le moto engathi yibhokisi yinhle futhi ivulekile ngaphakathi kubagibeli nempahla.

ISoul inezinhlobo ezahlukene ephuma nazo njengenjini kaphethroli engu-1,6 litre futhi uma uthanda uyayithola enamagiya ayisithupha azishintshayo.

Kuya ngenhlobo yakho kodwa ezinye izinto enazo zihlanganisa amalambu akhanya ubusuku nemini eLED, 7-speed DCT, cruise control nokunye.

I-2.0 SMART ne-1.6 CRDI SMART DCT ungazifaka isunroof enguR12 500.

Zonke ziphuma ne-warranty yeminyaka emihlanu, iroadside assistance yeminyaka emihlanu neservice plan yeminyaka emine noma ibanga lika-90 000km.