Yenza lokhu uma kunenkungu...
ININGIZIMU Afrika ibalwa namanye amazwe ahamba phambili ngezingozi emigwaqweni yakhona ezishiya kukhalwa emindenini ngenxa yokushona kwamalungu awo.
Umnikazi wesikole sokushayela esizinze eThekwini uMnuz Mte Zungu wenkampani Ubuyaluyalu Driving uthe okudala kakhulu izingozi ngabashayeli abasebenzisa amaselula beshayela.
Uthe enye yinkinga wukushayela ukhathele.
“Kukhona labo abazibona engathi sebevuthiwe bese bengayihloniphi imithetho yemigwaqo esibafundisa yona,” kusho uZungu.
Uthe nophuzo oludakayo nalo lunomthelela.
Inhlangano efundisa ukushayela iMasterDrive ikhiphe amathiphu okushayela uma kunenkungu ukuze kugwemeke izingozi.
Ithe uma izangoma zezulu zibika ukuthi kunezinkungu, thatha omunye umzila uma kwenzeka.
- Yenza isiqiniseko sokuthi amawindi ahlanzikile ngaphandle nangaphakathi ngoba angcolile anciphisa indlela obuka ngayo
- Ungawakhanyisi amalambu ngo-bright. Uma uwenze njalo kuba nzima ukuthi ubone ngakho kuncono ukuthi usebenzise ajwayelekile noma ama-fog lights.
- Gwema ukusebenzisa amalambu ezimo eziphuthumayo ngoba aphazamisa abanye abashayeli.
- Gwema ukushintsha amafog lights ngokufaka lawa akhanyisa ngokuluhlaza ngoba enza anciphisa amathuba okuthi ubonakale. - Nciphisa isivinini. - Shiya isikhala esikhulu phakathi kwakho nemoto engaphambili
- Vula iwindi. Uzozwa ukuthi kwenzakalani ngaphandi nokungakusiza ukuthi usheshe ugweme ingozi uma kunesiding. Kusiza futhi nokususa inkungu ngaphakathi.
- Bheka ukuthi ama-wiper angakusiza yini ukunciphisa inkungu.
- Gwema ukuvele ushintshe umzile.
- Yehlisa umoya uma ushayela.
- Ungavele ume emgwaqeni, abanye abashayeli kungenzeka bengakuboni ukuthi umile
- Uma inkungu iqinisa, ungavele ume phakathi nomgwaqo, thola indawo ephephile.
- Qaphela abashayeli abangakhanyisile.
- Sheshe uxwayise abanye abashayeli ngokwenzayo futhi uqale ubhreke kusanesikhathi
- Gwema ngayo yonke indlela izinto ezingakuphazamisa ushayela